Siman pasa diaranson instructornan di landamento escolar tabata den un reunion y a informa nan cu desde 31 di december 2020 lo ta ultimo dia di duna les. Esey ta nifica cu dia 1 di januari 2021 no lo tin landamento escolar mas.
E noticia aki tabata un shock p’e instructornan pasobra desde 1993 a bin cu e programa instructornan di landamento. Pa casi 28 aña nan ta duna e programa di landamento y pa diferente motibo a bin cu esaki. Aruba ta un isla rondona cu awa y si lag’e na mayornan, pasobra SIMAR sa cu e situacion financiero no ta pone cu tur mucha por haya les di landamento. Esey ta e motibo di a bin cu e programa aki, cual no a bin for di nada. A traha riba dje y bin cu un plan di cual a ehecuta esaki.
Durante e reunion aki a bisa nan door di COVID e lesnan ta bay bira mas digital y e muchanan di scol basico no ta na scol mas. Despues a bisa nan cu e landspakket cu Hulanda a manda pa enseñansa ta buta cu 1500 hende tin di bay cas. Josephine Albertus, presidente di SIMAR, a ta kere a pone e bintidos instructornan di landamento den e 1500, pero despues a bisa nan cu e curriculum no ta den scol basico mas y nan lo no existi mas.
A trece diferente motibo cu no ta husto y desde januari tin COVID na Aruba. E pregunta ta dicon COVID ta e motibo cu kier kita esaki. Aworaki door di e situacion financiero, ki siguransa e mayornan tin e ora cu nan tin placa of cu e situacion financiero pa manda yiunan les di landamento. E programa aki tabata yuda Aruba tambe. SIMAR a papia cu e instructuronan, kendenan a bisa e cantidad cu mucha ta hoga a bira inmensamente menos door di e lesnan di landamento.
Nan kier sa kico ta bay pasa cu nan rechtspositie desde 1 di januari 2021, pero no ta haya un contesta riba e pregunta aki. Ta di lamenta cu e juffrouwnan aki di landamento ta traha pa hopi aña no ta den vaste dienst. Esnan cu a cuminsa desde inicio no a crea un pension, pero aña pasa a bisa nan cu ta bezig ta traha riba esaki. A bisa e juffrouwnan cu nan ta bay haya vaste dienst, pa por traha riba nan pension.
Na januari a mustra nan notulen y splica cu e vaste dienst lo ta keda cla. Pero awo a bisa nan dia 2 di september esey no ta e caso y cu e programa no lo existi mas. No sa kico lo haci cu nan, pero a bisa nan pa cuminsa check desde awo pa un otro trabou. SIMAR no ta di acuerdo con a trata e instructornan ni niun hende den un crisis. Nan merece mas respet y mester bin cu un solucion.
