Outoridat di Aviashon Sivil Kòrsou tin un direktor general nobo

249

Outoridat di Aviashon Sivil Kòrsou (CCAA), a konosé su  direktor nobo den persona di Sr. Johan P.M. Steinmetz (Peter). Riba 11 di ougùstùs 2020 personal di CCAA, den kompania di Minister Jesus-Leito, direktor di sektor di Trafiko i Transporte sra. Hollander i direktor suplente di CCAA sr. Laplace, a keda introdusí na sr. Steinmetz.

CCAA pa un temporada basta largu a konta ku diferente direktor ku a asumí e enkargo temporalmente. Komo ku e funshon ta rekerí di un eksperto basta spesífiko a tuma tempu pa yega na e persona kalifiká  i ku interes nesesario pa ehersé e funshon.

Ministerio di VVRP a pasa den proseso di kasi un aña bou di guia di Deloitte pa asina yega na un kandidato. Na promé instante a risibí hopi reakshon di diferente parti di mundu inkluso Kòrsou. Segun e proseso di solisitut a sigui kana a keda ku 9 kandidato i despues 3,kual ta esnan ku despues di diferente kombersashon i “assessment” a demostrá di ta mas adekuá pa asumí e enkargo. Na final di e trayekto sr. Steinmetz a resultá e mihó kandidato.

Durante e proseso di solisitut e enfoke tabata pa selekshoná un kandidato ku lo bai tin e tarea di konkluí e ouditoria di International Civil Aviation Organization (ICAO)  i sigui traha riba e organisashon pe yega tambe bek na kategoria 1 di Federal Aviation Administration (FAA).

Sr. Steinmetz tin vasto aña di eksperensia den e ámbito di Aviashon Sivil i ta spesialisá den:

  • maneho di Aeropuerto;
  • desaroyo stratégiko den aviashon;
  • maneho di kambio i restrukturashon pa yega na un invershon ku benefisio.

Sr. Steinmetz a kuminsá su karera den Aviashon Sivil na Direktorado di Aviashon Sivil di Ministerie van Verkeer en Waterstaat, na Den Haag , Hulanda. Despues di esaki e la traha e.o. na Aruba, i su último funshon tabata komo Managing Director na Stockholm Skävista Airport na Suisa.

E echo ku sr. Steinmetz a biba i traha na diferente pais i su interes pa desaroyá su mes konstantemente ta pone ku e ta dominá diferente lenga entre nan nos dushi Papiamentu. Durante e enkuentro pa sera konosí ku personal Minister Jesus-Leito a trese dilanti ku esaki ta un momentu kaminda tur hende tin ku uni forsa pa asina saka lo máksimo, na bienestar di Kòrsou su aviashon sivil. Minister ta satisfecho ku e logro aki i di su banda e lo sigui pusha pa e maneho ku ta benefisiá e organisashon.