Hopi ta e reaccionnan cu a drenta despues cu 24ora.com, e website di pueblo, a entrevista un anciano di 75 aña, kende ta biba den un situacion deplorabel.
Francisco Sanchez ta biba na Brikstraat 17. Esey ta e unico cu a keda tambe di e cas, e adres, unda cu el a biba henter su bida. Casi un aña pasa, y no un luna pasa, e cas a kima por completo lagando e anciano riba caya. E unico ayudo cu e ta haya ta di un ruman muhe cu ta percura pa un biaha pa dia e haya su cuminda cayente, pero por lo demas, su bida ta un imagen fotografico di ancianonan cu ta biba riba caya di hopi paisnan Latino.
E storia aki a capta atencion di hopi hende cu no por kere e situacion existente aki na Aruba. Entre otro di Fundacion Ajudo na Aruba (FANA) cu a haya cu ta inaceptabel pa un persona di edad asina ta biba bou di e circumstancianan aki. Nan sa cu e ayudo cu ta brinda awo no ta soluciona su problema, pero ta spera cu e lo por contribui na algo pa cuminsa. Annelot Muijrs a splica cu a concentra specialmente riba e proteina cu e curpa di Francisco mester y a trece entre otro Ensure.
A splica cu nan lo tuma contacto cu otro fundacionnan pa mira si e por haya un cama, mientras cu ta en busca di un forma pa haya un luga di biba p’e.
