Cuanto di nos lo desea di por yega un siglo di bida? Awel, esaki ta e bunita edad cu Catrine Rivera – Solognier a cumpli diadomingo ultimo.
Catrine ta un persona cu a casa c’un ciudadano Venezolano, cual a haci cu el a muda bay biba na Venezuela. Un pais, segun Catrine, di hende amabel y maraviyoso, cu nunca a lag’e sinti cu e tabata un stranhero. E tabata mama di dos yiu: un yiu homber y un yiu muhe.
El a sigui conta cu semper el a core auto y te ainda e ta core auto. E tin rijbewijs internacional, di Aruba y tambe di Venezuela. Ta hopi auto el a core, riba caminda grandi, tin biaha pa 15 ora largo.
Su secreto pa biba un bida largo ta pa no rabia nunca. Den su caso, ora c’un hende zundr’e e ta keda wak e persona, pero e no ta bisa nada. E no ta laga ningun hende daña su beis p’e. No tene hende na curason, no worry cu eseynan. Bida ta hopi bunita, pero e hendenan no sa, nan ta existi.
Mundo ta maraviyoso, pero e hendenan no sa. Pa biba un bida largo, bo mester trata tur hende igual. No importa nan colo di cuero, pasobra esey no ta importante pa Catrine. Importante di un persona ta su alma, con su caracter ta, su educacion. Esey ta loke e hendenan mester siña compronde.
Pa el a yega 100 aña, el a hiba un bida trankil. Nunca el a sinti odio ni rencor pa un otro ser humano.
CONSEHO
Un conseho cu Catrine tabatin, tabata p’e mamanan. E mama- y tatanan di awendia ta faya cu nan yiunan. E ta corda cu su tata a cria 7 yiu homber, di cual 6 tabata profesional.
Den e mundo di awendia ta existi hopi materialismo. E mama- y tatanan moderno kier biba un bida di luho, nan ta materialista y egoista. Nan ta pensa riba nan so. Tarea di un mayor ta pa educa su yiunan. Hubentud di awendia ta pensa mas riba con pa yega na cosnan di balor, sin importa e berdadero balor di un hoben: educacion y respet. Un mayor cu no por cria un yiu, miho no trec’e na mundo.
Di parti Headlines Group, cas editorial di 24ora.com y bo matutino digital TREMPAN ainda kier a desea Catrine Solognier hopi aña mas di bida y salud. Hopi pabien cu e siglo di bida!
