Despues di e diferente invalnan cu a tuma luga na Aruba bou di investigacion Flamingo, e team di 24ora.com a topa cu ex Minister Otmar Oduber na su oficina riba L.G. Smith Blvd., banda di oficina di Notario Yarzagaray. E tabata den compania di su Abogado mr. Chris Lejuez y su prome reaccion ta cu berdad autoridadnan a bishita su cas, na Pavia, y un apartamento unda e ta kedando temporalmente.
Mi a caba di papia cu mi Abogado riba e acusacionnan cu ta wordo haci. Mi ta cooperando. Ministerio Publico t’ey pa haci su trabou. Mi a pasa den esaki un biaha caba. Tur hende por mira den medionan di comunicacion con e persecucion ta tuma luga, atrobe ta haya nos mes den e situacion. Nos lo coopera y na final di dia e berdad lo sali na cla.”
E ta bisa cu nan a mencion’e diferente sospecho, pero no a bay den profundidad of contenido di e sospechonan aki. Pero si a bay cu mita caha di unda e ta kedando actualmente. Pero e ta keda pendiente di loke autoridadnan informa su Abogado.
Pa loke ta e containernan (2) dilanti su cas, el a bisa cu eyden tin tur su mueblenan, pañanan y otro cosnan cu tabata den e cas na Pavia cu a kima algun siman pasa. “E cas ta completamente bashi.”. Segun el a splica, apenas recien a caba di atende cu seguro pa cual ta kedando ainda temporalmente otro caminda. “Mi ta spera cu e candela tabata un casualidad. E compania di seguro a bisa cu el a wordo causa pa un corto circuito.”
E mes ta trankil, segun Oduber, pasobra ta situacionnan cu como politico el a yega di pasa aden. E ta corda cu a atak’e fuertemente ora cu e tabata politico. Pero awendia e no ta politico mas y ta traha den sector priva. Unabes cu haya sa kico ta wordo investiga, lo mira e caminda cu ta bay cana. E caso den pasado a dura cinco aña y mey y na final 13 Hues y 7 caso a demostra cu “no tabatin nada”. “Den mi carera politico varios biaha kehonan a keda entrega contra mi persona y tambe Ministerio Publico a bisa despues cu no tabatin motibo valido pa investiga. Awo nos ta cooperando.
Na final el a bisa cu autoridadnan a keda dos ora na su cas y despues el a bay traha normal. “Mi ta kere den Ministerio Publico y mi ta kere cu e tin e mesun final cu esun di cinco aña y mei pasa.”
Abogado Lejuez
Mr. Chris Lejuez ta representa ex Minister Otmar Oduber. El a haya simplemente e informacion cu ta haciendo un investigacion pero e no sa contenido di e sospechonan. E no tabatin contacto cu ningun funcionario pa sa mas detaye di e caso.
