Diaranson merdia, den careda di 12:00PM un grupo grandi di empleado publico di nos hermana Isla Corsou a drenta den marcha rumbo Punda pa asina manifesta nan mal contento contra e Gobierno actual.
Igual cu ta pasando riba Aruba, na Corsou tambe tabata tin ahustacion den salario caminda a kita 12.5% riba salario di cada trahado. Un disgusta masha grandi tumando luga y ta pidi retiro inmediato di Gabinete Eugene Rhuggenaath.
Por a tuma nota di multidud di hende cu a sali for di Entrada principal ( Post #5 ) di Refineria Isla direccion Forti, caminda Gabinete di Gobernador di Corsou ta situa. Akinan ta caminda cu e situacion a cuminsa escala, manifestantenan a kibra candal drenta Forti y mester a pidi presencia di Riot Team pa drenta accion y purba domina e situacion. Manifestantenan no tabata mucho contento y a cuminsa pusha fuertemente contra autoridad.
Manifestantenan ta actualmente dilanti porta di Ministerio di asuntonan General sinta riba na vloer cu intencion di keda eynan te ora nan haya oido di e Gobierno.
Miembro di Riot Team a los tiro di advertencia pero esaki no a yuda e situacion, alcontrario e multitud a bira mas furioso y te cu awo akinan tur cos ta sumamente tenso den e area. Den manifestacion por a mira grupo grandi di personal di Selikor ( cu ta compania igual cu Serlimar aki na Aruba ) como tambe empleadonan publico cu ta pidi/ exigi pa e Gobierno tuma su retiro awe mes.