Organisacion di Pensionado Publico Aruba (OPPA) a sinta cu formado di gobierno y aki nan a presenta dies punto cu nan kier pa gobierno trece atencion na nan. Na momento cu un persona bira pensionado, e tin e percepcion cu no ta conta mas. Esey ta algo cu mester disparce, pasobra tur pais tin di reconoce, aprecia y duna balor na e grandinan.
Presidente di OPPA, Ivo Valdez, a indica cu nan a haya oportunidad di trece dilanti e necesidad di ciudadanonan, cuido general y AZV. E topico di AZV ta keda un topico hopi interesante y importante pa nan. Valdez ta haya cu nan no ta haya bon trato for di e instancia ey. Tambe a papia riba Departamento di Impuesto (DIMP). El a splica cu ora bira grandi no solamente ta castiga p’e añanan so, sino p’e instancianan tambe manera DIMP y AZV.
A hiba combersacion riba diferente punto cu ta importante pa hende grandi manera siguridad pa grandi, actividad social, Raad voor Ouderen, siguridad general, e leynan. Nan ta haya cu Aruba tin hopi ley, pero no ta enforsa nan suficiente. A papia riba enseñansa ya cu e ta importante p’e desaroyo continuo di pais y mester dedica atencion na dje.
A presenta algun cifra importante cu gobierno tene cuenta cu ne. OPPA a ripara cu desde januari pa 1 di juli a muri mas di 300 pensionado. Esey ta pone 52 pensionado pa luna y a trece cierto pregunta. P’esey a bin cu algun peticion p’e proximo gobernantenan cu ta “no papia di e grandinan pero papia cu nan, no pensa pa nos grandinan, puntra nan kico nan ta pensa”. E ta spera cu e puntonan treci dilanti haya oido den e proximo gobernantenan.
