Durante cu a trata presupuesto di pais Aruba di aña 2021 y Landsverordening Instelling Ministeries, diabierna ultimo a sosode algo lamentabel. E presidente di parlamento sin tuma tempo a haci wega door di cera e lista di orado sin duna e parlamentarionan, tin di nan nobo, oportunidad pa inscribi nan nomber pa papia. Esaki nunca bisto. Ta trata di un presupuesto manda pa Staten, 7 luna laat y a trat’e despues di 11 luna cu mester a drenta parlamento. Esaki ta un falt’i respet pa e instituto parlamento. Durante e reunion tabatin werkster presente den tribuna, cu ta traha na SKOA, nan ta na vispera di perde nan pan pa por cria nan famia. Esaki ta un situacion inaceptabel.
Wyatt-Ras a haci un apelacion na gobierno pa durante tratamento di e presupuesto concentra riba con por mantene nos hendenan na trabou. Esey ta un pregunta cu cada miembro di e constelacion mester contesta. Con e trahadonan di SKOA por mantene nan trabou. Tambe el a pidi pa haya contesta riba e preguntanan cu a haci pa loke ta trata e presupuesto. Un parti no a haya contesta den e ‘nota naar aanleiding van het verslag’. Fraccion a haci ademas ‘aanvullende vragen’.
Wyatt-Ras a trece padilanti cu nos pais a confronta cu COVID-19 door di cual tin un presion hopi grandi no solamente riba nos situacion financiero-economico sino tambe riba nos salubridad, enseñansa y asuntonan social. Pa e motibo ey ta importante pa nos recupera.
Nos mester rescata nos pais di e situacion aki y ta importante kico gobierno tin den tapara, pasobra manera Raad van Advies ta indica gobierno no a menciona nada di e landspaketten den presupuesto, siendo henter pueblo ta pendiente di e medidanan cu lo asota nos pais, saliendo fo’i e landspaketten. Wyatt-Ras a haci un apelacion na gobierno pa nan informa pueblo kico lo bay pasa cu e empleadonan publico? Ta bay bin cu e medida pa e empleadonan publico entrega 20 % di nan salario? Si esey ta e caso gobierno mester informa nos hendenan pa nan sa kico ta warda nan. Pregunta haci, mester haya contesta riba nan. Tambe no ta fair con nos ta wordo trata. Segun Wyatt-Ras, Presidente di Parlamento mester ta un presidente pa tur hende den parlamento, no pa un partido, ni pa un solo bandera politico.
