Si nos pensa riba e plachinan di number, mester pensa riba e diferente maneranan cu nan por wordo falsifica, sea riba metal of papel.
Omar Maduro, di Departamento di Impuesto, a splica cu e biaha aki a pone cu e plachi ta bin cu reflector. E tipo di letter ta di Alemania, cu no ta facil pa bo falsifica tampoco.
Antes no tabata tin e reflector. Awor cu tin’e, pa publico y KPA, esaki ta uno hopi bon. Por controla facil riba dje. Idea ta pa den futuro sigui traha riba dje. Pa 2020, sigui traha riba dje, pone chip den dje. Tin e barcodenan tambe, cu por pone den dje. Lo bay pone mas siguridad den e plachi.
Retraso no kiermen keda sin paga
Tabata tin retraso, pero na Departamento di Impuesto nan ta haal in. Pero esey no ta haci nada, pueblo tin cu paga toch pa nan plachinan di number.
Segun Omar Maduro, plan ta pa dia 7 di Januari nan keda cla, pero nan lo anuncia esaki via e canalnan oficial, sea cu e ta bira dia 7 of pa dia 8.
Awendia nos tin 78 mil plachi di number A. Maduro a splica cu A plaat a laga traha te cu 78 mil. A bende te cu 76.500. Tin un suministro cu nan ta bay te cu 78 mil. MFAnan a bay te cu 2300, esey ta e plachinan pa brommer.
Awor aki nos tin por lo menos 85 mil vehiculo riba caminda. Esey ta inclui tur cos aden. Esey ta basta, compara cu algun aña pasa.
Maduro mes no a pensa cu nan lo a yega asina leu. Hopi biaha e RDHnan, a haci diferencia y a haci cu e mucha hobennan ta haya un rijbewijs y ta busca un di e autonan barata aki, aumentando asina e cantidad di vehiculonan cu tin riba nos careteranan.
Tarifa no a cambia
Tambe algo cu no a cambia, ta cu esnan cu tabata paga 300 plus 6 florin pa e sticker. Esey ta cay afo. Esey lo bay bin pa e gastonan di plachi, cual ta 12 florin pa e prome mita y 8 florin pa e siguiente mita. Door cu ta bay over na un sistema nobo, e foutnan cu tabata tin den e sistema bieu, sea cu e cliente tabata paga un tiki di menos of tiki di mas. No ta un medida, sino un coreccion di e sistema, cu en principio no lo bay cobra bek loke tabata fout di e sistema. Pa 2019, e cliente lo bay paga loke e tin cu paga.
Pagonan di mita y full aña
Por paga mita aña of por paga full aña. Gobierno en principio a pone tambe pa esnan cu no ta A plaat, conforme ley, mester paga full aña. Tambe a haci’e mita aña pa nan tambe por pag’e of si nan ta desea tambe, nan por haci esaki.
Despues cu bo paga e prome mita aña bo ta haya e plachi grandi y despues cu paga e siguiente mita, por haya e plachi chikito.
Cuerpo Policial ta masha contento cu e plachi nobo a bin y ta haci facil nan control riba caya, na e manera ey.
Departamento di Impuesto tambe tin su parti cu si no paga, por pone boet administrativo, na momento cu e fecha yega, Maduro a splica.
