MetaCorp a cera aña 2018 cu trahadonan di tur su companianan subsidiario, esta New York Laundry, Maduro Travel, ATCO Concrete, EcoGas y EcoTech, ATCO Aruba, Tropical Bottling Company y MetaCorp mes. A topa dilanti ATCO Concrete na Barcadera pa despedi di aña 2018. Den un ambiente ameno cu yen di sonrisa, MetaCorp a yama ayo na aña 2018 cu un pagara grandi di no menos cu 8 miyon tiro.
E mainta a cuminsa cu 1 minuut di silencio pa recorda nan colega Rowley Hernandez di ATCO, kende a fayecerecientemente di forma inespera.
Eddie de Veer, CEO di MetaCorp, a gradici cada empleado patabata presente na e evento di fin di aña. El a expresa cu nan a cera e aña 2018 hopi fructifero, cu hopi trabou, hopi esfuerso y mehoracion. E famia gandi di MetaCorp ta spera di habri 2019 cu mas mehoracion, mas beneficio pa nan mirando cu mundo ta birando dificil. Competencia ta mas fuerte, pero MetaCorp tin e ekipo corecto pa bay dilanti, asina el a expresa na cada empleado.
Eddie de Veer hunto cu e COO di MetaCorp, Robert Carrasquero a sigui cu e tradicion y a cende e pagara di 8 miyon tiro. Empleadonan hunto cu nan famia tabata feliz di a despedi e aña pa drenta 2019 cu e meta di sigui bay padilanti den e compania.
Tipico Macuarima a deleita tur presente cu un dande deseando e compania, gerencia y cada persona un prospero 2019. E banda Rincon Boys tambe tabata presente y a pone tur hende move riba nan dushi musica.