E situacion di temblornan cu a sosode na Puerto Rico desde dia 7 di november, Oficina di Prevencion di Desaster a bin ta monitorea e frecuencia y magnitud cu e ta bay subiendo. Diamars mainta tabata tin uno cu a pasa 6.0 riba escala di Richter.
Segun Rino Hermans di Oficina di Prevencion di Desaster, internamente tin un procedura cu una bes cu e pasa 6, tin 3 punto di atencion cu ta monitorea, cual ta Puerto Rico, Montserat y Grenada, pa e volcan Kick ’em Jenny.
P’esey a manda pidi e dienstnan diamars mainta pa nan revisa nan plan y entrega nan capacidad y nan necesidad den caso cu bin un Caribbean tsunami.E particular di esaki ta, cu e ta wordo considera como un tsunami local, pa motibo cu internacionalmente ora e comision di tsunami papia di cualkier temblor cu por causa un tsunami, e ora por consider’e un tsunami local.
Esey ta duna Oficina di Prevencion di Desaster poco tempo pa alerta tur hende. Esaki tin un parti di preocupacion, si, segun Hermans, pasobra ora cu e temblor tuma luga, e señal tin cu bay Hawaii prome, unda ta analis’e pa mira si el a crea un tsunami. Tin boei di tsunami cu mester wordo manda y nan traha e boletin pa mand’e pa Meteo Aruba y pa Meteo manda Oficina di Prevencion di Desaster. Henter e proceso aki ta dura 28 minuut.
Si mira e temblor cu a tuma luga na Ponce, pa Aruba e lo nifica, cu si e tin efecto, ta bay dura mas of menos 40 minuut pa e prome ola yega. Segun Hermans a splica, tin 12 minuut pa alerta henter pueblo, manera a sosode cu e situacion di temblor na Ponce. Pero no ta un asunto cu ta wordo monitorea desde dia 7 di november pero hopi prome. No ta un secreto cu ta monitorea e situacion den Caribe, cual ta Montserat y Grenada cu Kick ’em Jenny cual ta un volcan bao di awa.
Alerta na pueblo
Desde aña 2013 Oficina di Prevencion di Desaster ta uzando Alert FM. Mirando den e dianan aki cu tin un atencion riba dje, lo bolbe publik’e atrobe. Riba Facebook tambe ta mustra con pa registra. Ta haya un zip code, cu for di eynan ta haya mensahe cu tin un tsunami na caminda. Particularmente na Aruba, si ta 2 kilometer for di costa, ta safe. Tur indicacion ta mustra cu na cierto momento nos ta safe. Mirando e area for di unda cu e ta bin, Noordkant ta bay hay’e, si e surgi. Ta bay haya e corner wavenan cu ta bay bira bin bek y lo bay dal di pazuid, pero ya hopi energia lo bay fo’i dje. No ta un situacion di bay den panico, pero si ta un situacion cu tin cu keda monitor. Oficina di Prevencion di Desaster no tin Aruba riba alerta. Y te asina leu esey ta e situacion di temblor na Puerto Rico.
Tsunami
Den caso di un tsunamo na Ponce, Puerto Rico, e dura 40 minuut ora cu e prome ola yega Aruba. Tsunami no lo bin cu un ola. E lo keda bin cu ola pa simannan largo prome cu full e sistema neutralisa bek.
