Satish Daryanani ta e presidente nobo di Camara di Comercio di Aruba. El a splica cu semper e prome reunion di directiva di Camara di Comercio, ta eligi e presidente y e vice presidente, como tambe esnan cu tin mas tempo como miembro di board, ta keda como presidente reemplasante, si en caso e presidente y e vice presidente no ta disponibel na Aruba.
Esaki a tuma luga diaranson, cu tabata e prome reunion di directiva y tabata tin un decision caminda cu Satish Daryanani a keda eligi como presidente y Omar Tromp ta vice presidente.
Tambe tin Anthony Croes, a keda eligi como presidente reemplasante. Naturalmente tin e director presente, kende ta Martijn Balkenstijn.
Daryanani tabata vice presidente e aña anterior, cual tarea no a cambia mucho. E intencion semper ta, como Camara di Comercio, duna un bon input na Gobierno.
Na final ta gobernantenan ta pasa ley, nan ta tuma decision. Pero si nan ta habri pa ricibi feedback cu Camara di Comercio ta haya di comercio en general y di pueblo.
Camara di Comercio ta den conseho riba varios aspecto, riba asuntonan laboral, social, cultural y F&B of Hospitality, sector hotelero, mundo bancario, etc.
Tin hopi informacion cu a haya local y tambe for di exterior y tin cu duna nan feedback na Gobierno, pa gobernantenan haci nan trabao y tuma e decision corecto.
Vision
Segun Daryanani, tin cu haci tur cos posibel na bienestar di Aruba. Esey ta e intencion di gobernantenan tambe. Camara di Comercio lo yuda pa por yega asina leu. Na final tur cos mester keda den balans. E parti social y di economia mester keda bon balansa.
Ken ta Satish Daryanani
Satish Daryanani ta pensa cu Camara di Comercio mester ta inclusivo no exclusivo. For di tempo e tin 21 aña e ta na Aruba. Esey ta prome cu Status Aparte. Y pa e lesa cu Arubianonan no ta tuma e stoel of stranhero ta tuma e stoel di Camara di Comercio, mester wordo descarta. Tur di nan den e directiva, por sinta den e posicion aki.
Pero ta bira ken kier y ken tin e tempo disponibel, pasobra e no ta un trabao paga. Mester haci’e di boluntad. Mester tin tempo pa haci’e y mester haci’e bon. El a bisa cu si el a drenta directiva no ta pa bira miembro so. Si e tabata pa bira presidente, cual e ta awo. Y awo cu e ta presidente, e lo haci su maximo esfuerso pa Aruba en general. E trabao no ta facil, ni dificil tampoco. Tur cos ta depende e momento ey ken kier. Si tin tres hende cu kier, e ora e ta bay pa votacion. Si tin dos hende, tambe ta bay pa votacion.
Si ta un hende so cu a pone su nomber, e ta pa aclamacion. Pero e mester ta na momento di e prome reunion y no prome cu esey. Y di e forma ey e eleccion di e presidente a bay.
