Recientemente riba Facebook di 24ora.com a lansa un encuesta pa sondea opinion di publico relaciona cu duracion di e coalicion cu ta formando e Gobierno actual. Den e encuesta a participa un total di 659 usuario. E resultado riba e pregunta: Bo tin confiansa cu e Gobernacion actual lo completa nan periodo indica di goberna (4 aña)? Un total di 60% NO tin confiansa aki versus 40% cu SI tin confiansa.
Manera ta conoci, na comienso di e Gobierno nobo, Parlamento tabata consisti di cuater fraccion esta AVP, MEP, POR y RED. Na luna di November 2019 un Parlamentario di e fraccion di MEP a dicidi di bira independente pa cual awor den Parlamento tin 5 fraccion.
Tanto den Partido MEP como den POR tin cambionan grandi cu a y of lo tuma luga den e siguiente dianan pa cual sigur no necesariamente ta duna un indicacion di stabilidad. Un scenario cu tin hopi wowo riba dje ta e hecho cu na comienso di e coalicion e rol di partido RED no tabata esencial pa a forma e coalicion pero awor si su influencia ta hopi importante pa mantene e coalicion na bida.
