“Rumannan sacerdote, religioso y diacononan, mi ta manda e mensahe aki pa Boso transmiti na Parokianonan y comunidad religioso cu por a tuma nota di e preocupacion cu tin rond mundo en conexion cu e virus Covid 19 (Corona virus). Aunke e no a yega Aruba y no tin motibo pa panico, mi ta di opinion cu e miho accion ta pa nos tur traha riba prevencion. Den e cuadro aki mi ta sugeri algun medida di prevencion cu ta conta pa henter Obispado di Willemstad, esta Corsou, Aruba, Boneiro, St. Maarten, Statia y Saba”, asina Obispo Luis Antonio Secco a duna di conoce.
E Obispo a decreta cu entrante 1 di Maart 2020 te na un proximo aviso:
- No ta ricibi e Santa Hostia riba lenga, sino den man;
- Solamente sacerdote celebrante ta tuma e Sanger di Cristo for di e calis;
- No ta duna man ora ta desea otro paz;
- No ta uza awa bendita na entrada y salida di porta di misa.
Corda laba man frecuente cu habon of uza un sanitizer cu por lo menos 70% di alcohol. Tosa of nister den un tissue di papel y tir’e afo of si no por otro, tosa den Bo elleboog. Den caso cu bo sinti sintoma di griep, keda cas y yama bo Dokter di cas na telefon.
Corda bon, no tin motibo pa panico, pero ta bon pa cuida nos mes y nos rumannan cu medidanan di higiena.
Tambe laga nos keda semper na altura di tur informacion cu instancia oficial di Gobierno ta provee pa cu e situacion aki, pa asina nos por semper mantene trankilidad, maneha informacion corecto y sigura cu nos comunidad ta prepara cu yudansa di Dios pa cualkier eventualidad.
“Mi ta pidi pa haci oracion pa tur enfermo rond mundo y pa tur hende cu ta cuida nan. Boso por conta semper cu mi oracion”, asina Obispo a termina bisando.
