Konsiente di su responsabilidat, Kuerpo Polisial di Kòrsou ke hasi un yamada na shofùrnan di vehíkulonan ku ta partisipá den tráfiko, pa no usa telefòn miéntras ku bo ta fungi komo shofùr di kualke vehíkulo.
Tin demasiado aksidente ku ta keda kousá, pa motibu ku e shofùr a kita su atenshon for di tráfiko, pa e atendé su telefòn. Un aksidente por sosodé den un frakshon di sekònde ku bo kita bo bista for di riba kaya. Den kaso ku bo tin urgensia pa atendé sea un yamada òf reakshoná riba un media sosial riba bo telefòn na momentu ku bo ta stür, pone bo vehíkulo un ratu na kantu di un manera responsabel, atendé e telefòn i despues kontinuá pa bo destinashon.
Tene kuenta, ku huntu ku bo tin mas hende ta partisipando den tráfiko. Kada un aksidente ta di mas. No laga pa abo ta kousante di e próksimo. Ban kore responsabel. Kuida nos mes i kuida otro den un tráfiko mas sigur!
