Minister di naturalesa, Ursell Arends a cuminsa diaranson merdia cu loke ta su parti di e tratamento di presupuesto di Pais Aruba pa aña 2023. Como titular di naturalesa, e mandatario ta spera cu miembronan di Parlamento, en todo caso, esunnan di coalicion, lo tin pregunta tocante e ultimo desaroyo y plannan pa cu Serlimar. Minister Arends a comparti algun di e informacion cu e tin prepara pa trece dilanti, incluyendo e plan pa cera dump di Parkietenbos manera anuncia na fin di e aña’ki y su satisfaccion pa con cosnan ta canando na e compania estatal di regocemento di sushi.
Serlimar a pasa den un etapa cu e tabata den surseance van betaling. Practicamente tabata un compania den bancarota cu un total di 21 miyon florin na debe. Segun Minister Arends, ta for di aña pasa ta bin ta haci ehercicio conhuntamente cu e director interino y cu e hunta di supervision cu ta completo desde april 2022. Di e manera aki a implementa varios punto di atencion.
Un di nan, e mandatario a splica tabata pa hisa entrada y baha gasto. A organisa e compania internamente pa e ta fuerte y a hisa prijs di loke ta cobra normalmente pa e bari y servicio. “Tur esakinan ta dunando nan resultado. Aworakinan Serlimar financieramente ta bayendo den un bon direccion,” asina minister Arends a declara.
Adicionalmente, a enfatisa na sindicato STA y SEPA cu dia 31 di december Parkietenbos lo sera y cu e tres puntonan cu tabata importante pa e trahadornan ta garantisa. Ta trata di nan cupo di trabou, cu ta traspasa e operacion pa un solo compania y cu ta nombra un director nobo. Minister Arends: “E 19 trahadornan cu ta traha riba Parkietenbos nan trabou ta garantisa, tin un total di 24 compania cu a participa den Trash2Cash y tur ta forma parti di e blueprint pa loke ta trata e procesamento di desperdicio. Ttin di nan ta cuminsa e aña aki, tin di nan ta cuminsa otro aña mirando cu nan tin cu haci inversion cuantioso y e di tres punto tabata un director nobo cu a concretisa.”
