En conexion cu e careda grandi cu ta tuma lugar diadomingo awor dia 25 di maart 2018, IBiSA ta informa pueblo di Aruba, specialmente tur atleta, cu no ta permiti bicicleta, Skateboard, cacho, tampoco auto pa core banda di un coredor riba e trayecto di Aruba su International Half Marathon.
Añanan anterior por a tuma nota di varios bicicleta y tambe auto cu ta core hunto of na banda di un of mas atleta. Pa siguridad di participantenan y segun reglanan internacional esaki no ta permitibel y Cuerpo Policial lo ta estricto cu control den e parti aki. Como organisador IBiSA ta basa su mes segun reglanan. Pa loke ta trata bicicleta of auto riba ruta pa compaña un participante esaki ta segun regla 5.3 di ‘Rules & Regulations AIHM 2014’. Si organisador tuma nota cu esaki toch ta e caso, e participante por wordo descualifica.
Excepcion riba bicicleta y auto entre otro ta solamente pa personal di asistencia pa prome auxilio, tambe pa e coredo Sr. Alberto Maduro cu tin problema cu su bista. Riba ruta ta haya tambe personal di IBiSA, Cuerpo Policial y Prensa, cualkier otro vehiculo cu no tin un identificacion valido di IBiSA, lo wordo desvia door di miembronan di Cuerpo Policial.
Otro punto importante pa e participante tene na cuenta ta cu tampoco ta permiti pa tuma nada di bebe of come for di ningun persona na banda di caminda riba e ruta di Half Marathon. Segun regla 2.12 di ‘Rules & Regulations AIHM 2014’, solamente por tuma na e respectivo waterpostnan cu organisador IBiSA tin riba e ruta, cu ta na 5K, 8K, 11K, 14K, 17K y 19K.
Instituto Biba Saludabel y Activo, IBiSA ta pidi tur participante pa tuma bon nota di e reglanan aki y tur demas cu ta stipula den e ‘Rules & Regulation AIHM 2014’. Por subi riba Facebook di IBiSA y sigui tur detaye y informacion di e calendario di actividad anual.
