Nos tur tin mester di Dios, p’esey nos mester wak bon con nos ta trata Dios, pasobra di Dios nos bida ta depende, nos cas y nos famia, y tur locual nos tin, hopi hende ta actua manera no ta asina. Parce cu nan ta independiente,pero con nos por bira independiente di Esun cu ta duna nos rosea.
Mira expresionnan contra palabra di Dios, y principionan di Dios, ta tumando luga rond mundo, y nos no ta keda afo, pasobra nos tambe ta parti di mundo.
Nos tin cu para keto un rato y puntra nos mes, na unda nos a pone Dios den nos bida?
Señor ta bisa: Pasobra e hendenan aki, ta acerca mi cu nan boca, y ta honra mi cu nan lipnan, ma nan curason ta leu for di Mi, y nan temor pa Mi ta consisti di mandamento di hende, cu nan ta siña for di cabes (Isaias 29:13).
Aki nan nos ta mira cla ora hende ta papia un cos y despues ta haci otro cos ,pasobra nan actitud ta contra palabra di Dios, door cu nan curason ta leu for di Dios.
Ay di esunnan cu ta sconde nan plan bon scondi pa Señor, y cu ta haci nan obranan den un luga scur, y nan ta bisa. Ken ta mira nos of ken conoce nos? (Isaias 29:15).
Dilanti di Dios nada no ta keda scondi, tur cos ta cla den bista di Esun cu nos tin di atende cu ne.
Pasobra e hende cruel lo yega na su fin. E hacido di bofon lo no existi mas, di berdad tur cu tin intencion di haci maldad lo wordo corta ki ta afo (Isaias 29:20).
Ay di e yiunan rebelde, Señor ta declara, kendenan ta ehecuta un plan cu no ta di Mi, y cu ta cera un aliansa cu no ta di Mi Spirito, pa montona pica, riba pica (Isaias 30:1).
Nos no por complace cu hende, mas cu nos ta atende cu Dios. Pasobra ta fabor di hende mi ta busca awor, of di Dios. Of ta hende mi ta trata di agrada? Si ainda ta hende mi ta trata di agrada, lo mi no tabata un sirbido di Cristo (Galationan 1;10).
Ta hopi tin cu ta busca siguridad, den mundo y den sistema di mundo,den e scuridad di mundo y nan ta lubida cu e palabra di Dios ta corecto y perfecto, pero e sistema di mundo ta corupto.
Nan ta bini cerca bo,manera e pueblo ta custumbra di bin, y nan ta sinta bo dilanti manera Mi pueblo, y nan ta tende bo palabranan, ma nan no ta cumpli cu nan. Pasobra cu nan boca nan ta mustra hopi amor, ma nan curason ta sigi tras di nan ganashi inhusto (Ezekiel 33:31).
Dios ta avisa nos pa no biba un bida parcial, pero biba pa Señor cu un curazon ferviente pa sirbi Dios na tur momento, pasobra Dios no kier hende cu ta aparenta, pero e ta busca esunnan fiel di curason, pasobra nan lo cumpli cu Su proposito.
Ki ora nos ta rechasa Dios den nos curason;
Ora nos ta haci pica conscientemente.
Ora nos no kier pordona.
Ora nos ta papia malo di otro.
Ora nos ta biba den inmoralidad.
Ora nos sa masha bon cu ta maldad, pero nos kier complace cu hende y keda malo cu Dios.
Ora e pica ta nos dilanti y nos no kier arepenti.
Ora nos ta haci bofon di Dios.
Si nos confesa nos pica Dios ta fiel y husto di pordona (1 Juan 1;9).
