Ayera merdia Corte di Prome Instancia a cuminsa cu tratamento di e caso contra e locutor di radio Elvis Weert. El a bira popular presentando e programa “Boca na Palabra” tur merdia na Top 95 Fm, unda e ta uza “querido oyente”. E caso aki tabata PRO FORMA, es decir cu no ta cla ainda cu tur prueba pa por trata e caso mas ampliamente.
Ta acusa Rudy Elvio Juaquino Weert, miho conoci como Elvis Weert, di lo a comete abuso sexual cu un menor di edad, cu tabata bou su cuido y vigilancia, durante e periodo di 19 di maart 2005 y prome di maart 2009. Ta acus’e tambe di a comete actonan di inmoralidad contra e persona menor di edad aki, cu tabata na su cuido y vigilancia, durante e periodo di 19 di maart 2006 te 19 maart 2009. Un di tres acusacion ta cu el a duna e persona aki, un tratamento (abortus) di cual e tabata sa cu lo termina su embaraso durante periodo di 19 di maart 2006 te 19 di maart 2009, sin permiso di e persona. Tambe cu den e proceso, el a haci e menor di edad daño!
CASO PRO FORMA
Abogado defensor di E. Weert, mr. Peter Mohammed a informa cu e caso no ta cla pa trata extensamente. Ainda falta algun cos pa investiga, pa cual fiscal a pidi pa trat’e un biaha mas Pro Forma, dia 5 november proximo. E abogado a admiti cu e acusacionnan ta basta serio, pero den transcurso di tratamento di caso lo evalua con ta sigui y kico por prueba y kico no, riba cual fiscal lo por duna un castigo basa rib’e pruebanan.
Hues a bay di acuerdo cu e peticion di fiscal pa pospone e caso te dia 5 di november, pa trat’e un biaha mas, Pro Forma, pa asina tin mas tempo pa investiga e acusacion di inyecta e menor di edad causando un abortus. Al final, mr. Mohammed no tabata kier a duna mucho informacion mas rib’e caso, pa asina kisas no perhudica su cliente (mas ainda).
INOCENTE
Loke si a hala atencion ta cu segun mr. Mohammed, su cliente, na comienso a declara su mes inocente di tur e acusacionnan. Algo dificil pa kere, mirando cu ta tres acusacion hopi serio. No ta algo c’un persona ta bay inventa asina asina. Na ultimo mr. Mohammed a indica cu Elvis Weert lo keda cera te dia su caso bin dilanti, PRO FORMA, esta dia 5 di november.