Ora nos mira diariamente, cuanto cos ta modernisa, cuanto hende kier cambia cos na nan fabor, sea pa ignorancia, orguyo, of hamber pa poder, of pa complace cu maldad, maldad y inmoralidad, nos tin corda lo siguiente: Cu Pablo un Apostel, no manda for di hende, ni door di hende, ma door di Hesus Cristo.
Y Dios Tata kende a lanta Cristo for di e mortonan (Galationan 1:1) a skirbi tocante hende cu kier troce e evangelio di Cristo den Galationan capitulo 1:8 -10 bisando: Ma maske nos, of un angel for di cielo, lo a predica na boso, un evangelio contrario na esun cu nos a predica boso, cu e sea maldiciona. Manera nos a bisa caba, asina mi ta bolbe bisa awor: si cualkier hende predica na boso un evangelio contrario na esun cu boso a ricibi, cu e sea maldiciona.
Pasobra ta fabor di hende, mi ta busca awor of di Dios? Of ta hende mi ta trata di agrada? Si ainda ta hende mi tabata trata di agrada, lo mi no tabata un sirbido di Dios.
Pero locual ta para skirbi den Mateo 24:35 keto bay ta vigente y lo no cambia: Cielo y tera lo pasa ma Mi palabranan lo no pasa.
Den Isaias 40: 8 Dios ta recorda nos tur cu: Yerba ta seca, flor ta marchita, ma e palabra di Dios ta permanece pa semper.
Si Dios ta spierta nos ta pasobra lo siguiente ta tumando luga: Pasobra e tempo lo bin cu nan lo no soporta doctrina sano mas, ma alcontrario, pa satisface nan mes deseonan, nan lo acumula pa nan mes siñadonan pa bisa locual nan horea cu ta kishiki kier tende, y lo bira nan horea for di e berdad, y lo bolbe na fabula.
No ta algo desconoci cu respet pa Dios y su palabra, ta menguando riba mundo, pero como yiunan di Dios, nos tin cu zorg pa e palabra di Dios, no mengua den nos hogar, nos bida, ni tampoco nos famia.
Pasobra productornan di infieldad na Dios, na matrimonio, y na famia, ta aumentando cada dia, treciendo cosnan dilanti cu ta distrai hende for di e caminda berdadero, y hinca hende den nan negoshi di maldad y scuridad.
P’esey como mayor nos mester ta cauteloso awendia, kico ta laga nos yiunan mira, tende of apoya, pasobra e enemigo ta purba drenta den tur cos.
Pa semper, Oh Señor, Bo palabra ta estableci den cielo. Bo fieldad ta di generacion,pa generacion, Bo a establece tera y e ta keda para (Salmo 119:89).
Materialismo tin mente di hende domina, bruheria y spiritismo kier drenta den tur cos, hasta awor pa promove un remedi, pornografia ta adapta den dje. Pasobra den tur cos e enemigo kier trece mal influencia.
Nos kier recorda tur hende cu den Hebreonan 12:25 ta para skirbi: Mira pa boso no rechasa Esun cu ta papia. Pasobra si eseynan no a scapa,ora nan a rechasa esun cu a spierta nan riba tera,cuanto menos nos lo scapa, si nos bira bay , for di Esun cu ta spierta for di cielo.
For di den paraiso e diabel a purba di contradeci, palabra di Dios cu mentira bisando cu locual Dios ta prohibi, no mester ta obedeci.
Awendia e mentira a modernisa y a haya transporte door di esunnan cu ta trastorna e palabra di Dios, y ta papia confusion constante,pa mantene idolatria, maldad, y inmoralidad na existencia.
Pero maske kico hende haci e Palabra di Dios no ta cambia, pasobra nos Dios ta fiel na Su Palabra.
Sinceramente,
Pastoor Marcel Balootje.
