No ta sosode hopi cu un banda local, manera ‘N FUZION lo haya e oportunidad unico den nan carera pa ta “opening act” pa un cantante asina conoci mundialmente manera Mariah Carey. Esey lo sosode dia 25 di mei proximo na Harbour Arena durante e di 20 aña di Aruba Soul Beach Music Festival.
Diahuebs merdia Ofo Escudero a firma e contract hunto cu Chido Henriquez, den representacion di e organisadonan di e evento grandi aki. Esaki sin duda ta un di e eventonan, sino ta e unico, cu ta atrae un cantidad grandi di turista, cu ta gasta hopi y cu ta keda bin tur aña.
“Ruman, con bo kiermen? Mi ta super orguyoso”, asina Ofo Escudero a reacciona despues cu nos a tuma nota di su publicacion riba red social. El a haci comosifuera cu esaki ta “un toca mas”, sin cu el a realisa cu esaki lo ta e toca cu e artistanan di mas reconoci mundialmente cu e lo comparti escenario cu nan. Mesora a cuminsa prepara e reportorio cu ‘N FUZION lo presenta e anochi aki, pa complace e turista y local cu ta atende Soul Beach.
Tocante Soul Beach Music Festival 2024
Entre dia 22 te cu 27 di mei 2024, Aruba lo conta cu e di 22 edicion di evento di Soul Beach Music Festival durante ‘Memorial Day Weekend’. E evento lo conta cu un line-up di Earthquake como e artista principal riba diasabra, sigui pa e gran artista Mariah Carey cu lo pone un espectaculo riba diasabra y lo culmina e weekend cu Boyz II Men como e artista principal riba diadomingo. Ta estima cu algun mil bishitante lo bin Aruba pa e siman di evento aki.
No a alarga e contract: Esaki t’e ultimo Soul Beach
Mester menciona cu entretanto Aruba Tourism Authority a informa e organisadonan cu e aña aki lo ta e ultimo evento cu lo conta cu e patrocinio miyonario di nan fondonan. Tin varios motibo pa esaki, pero un cu ta pisa mas ta e temporada cu ta organis’e. E hotelnan mayoria ta yen caba y no tin espacio pa acomoda e amantenan di musica soul. Otro asunto ta e artistanan cu ta scoge pa trece Aruba. No ta conoci si lo por tin un apertura den e negosacionnan pero e ultimo decision tabata cu ATA entodo caso no lo sponsor e evento aki mas.
Tocante Mariah Carey
Ganado cinco biaha di e premio Grammy, Mariah Carey, a gana mas o menos entre 1.965 miyon y 2.38 miyon Dollar Mericano na aña 2022, cu su hit “All I Want For Christmas Is You”, cu el a lansa desde aña 1994 caba. E cantante ta bon awendia pa un fortuna di 340 miyon Dollar Mericano. Billboard a raporta cu e diva di e genero R&B, di 54 aña di edad, a genera 1.747 miyon uzo di e cancion cataloga como e himno di Pasco. Ta estima cu el a graba 16 miyon disco di e cancion aki, cu a hacie e cancion miho bendi pa un cantante femenino na mundo y un di e mihonan di tur tempo.
Tocante ‘N Fuzion
Ofo Escudero a funda e banda ‘N Fuzion dia 9 di november 2013. E banda, den su dies prome añanan a sali banda di aña na dos ocasion y banda di carnaval como seis biaha. Nan ta masha exitoso y hopi pidi pa fiesta priva y den hotel.
