Recientemente Edwardo Alex Matthew ta den noticia atrobe pa denuncia varios iregularidad sosodiendo den nos sistema hudicial. “Nos tin un par di hues den posicionnan, manera vice presidente di corte Jacques Keltjens cu ta sinti cu por tuma ley den su mesun man,” segun Edwardo Alex Matthew, kende ta bisa cu aparentemente ta mustra cu na Aruba tin un ‘kliek’ den husticia cu ta traha hunto pa haci y deshaci.
Matthew a entama un caso cu ta un executiegeschil algun siman atras anto esey ta cay na corte di prome instancia. Pa motibo cu sr. Keltjens tin un problema personal cu ne segun Matthew ta declara, e ta dicidi pa hiba e caso cu a entrega como schorsingverzoek na hof. “Si un hende entrega un caso na corte di prome instancia, hof no por trata e caso, un hues no por tuma decision riba su mes p’e por hiba e caso den un otro instancia, esaki ta imposibel.”
Matthew ta bisa cu esaki ta un ‘kliek’ na Aruba cu por haci cierto cosnan, nan ta amigonan cu tin amistad cu banconan, huesnan y fiscalnan, ta ful algo cu bo no por deshaci di dje. Bo ta cuminsa un negoshi y banco no kier duna bo un cuenta por ehempel. “Y mi ta scucha otro hende papia mescos atrobe, pa kico Aruba Bank no por duna mi un cuenta, kico mi a haci e banco cu nan no kier duna mi cuenta, of CMB, bo ta percura pa presiona mi den cierto forma y spera cu algo bon por sali for di dje na bo banda.” Matthew ta bisa cu esey ta loke e banconan, fiscal y huesnan ta haci cu tur hende. Bo por tuma nota riba kico tur ta biniendo den prensa ultimo tempo. “E ora ey bo sa cu ta esaki ta nan sistema.”
