Diabierna 31 di mei y diasabra prome di juni, lo tin un espectaculo musical na Curaçao Festival Center. Un cantidad grandi di e artistanan conoci di Caribe lo presenta na Corsou durante di Caribbean Splash.
Despues di e gran exito di e prome edicion na 2023, fundacion Binti Ocho a tuma e batuta completamente pa bolbe pone un show inolvidabel e aña aki. E intencion ta pa crea un experencia musical cu ta consisti di diferente genero cu lo ta presenta riba dos escenario. For di Reggae, Dancehall, Hip hop, Soca, Afrobeat te na e ritmonan Latino y urbano.
Aña pasa e lista di e artistanan tabata increibel, e aña aki lo ta ainda mas grandi, ya cu nan a enfoca riba un line-up pa grandi y chikito. Region di Caribe, ta representa pa e banda One Flavaz, di Boneiru Semii Marten, di Aruba Jeon, e DJ di Surnameño Gilly Gonzalez, for di Jamaica Beenie Man y Tarrus Rilley, di St. Vincent Skinny Fabulous y di Cuba Gente de Zona. Como artista internacional, nan a invita Busta Rhymes, Omah Lay y Kamo Mphela. E area di DJ ta representa pa DJ Phaphane, Alex Sargo, Krokzz, Grizzly, King Kembe di Sint Maarten, Francia y Corsou.
Fundashon Binti Ocho ta e organisacion responsabel pa e gran evento aki. Fundashon Binti Ocho ta un grupo forma pa un team di residente local dedica cu ke atrae turismo cu e eventonan unico pa pone Corsou riba mapa internacional. Nan ta spera di yega 16000 bishitante e aña aki y supera e exito di aña pasa di 14000 bishitante. E bishitantenan aki ta bini di Aruba, Boneiro, Surnam, Sint Maarten, Hulanda y Merca.
Ademas di musica, lo tin tambe un patio di cuminda amplio cu lo consisti di un combinacion excelente di cuminda y bebida. E portanan di e evento aki lo habri diabierna pa 7:00 pm. Diasabra tur cos ta cuminsa 4:00 pm. Lo cuminsa cu e Djnan pa entretene publico y e shownan ta cuminsa pa 5:00 pm.
Percura pa bo no perde e evento monumental aki. Ya tin un cantidad limita di carchi den pre-benta na un prijs reduci. Manera esakinan caba, e carchinan di weekend lo ta disponibel na prijs normal. Pa mas informacion tocante e evento aki, bishita www.bintiocho.eventonan.
