Den un carta fecha diabierna dia 17 di februari 2023, e director di Aruba Trade & Industry Association (ATIA), Herrick Henriquez, a dirigi su mes na director di Departamento di Impuesto Aruba (DIMP), mr. Luenne Gomez-Pieters, cu peticion pa por haya un reunion pa logra miho splicacion riba e implementacion di e reforma fiscal. E asociacion di comerciantenan ta sinti cu henter e ehecucion a causa masha incertidumbre den comunidad y cu comercio a keda mas bruha cu nada.
ATIA ta skirbi cu desde dia 1 di januari 2023 a implementa varios cambio den nos ley fiscal. E organisacion ta convenci cu e cambionan aki a trece cu ne hopi incertidumbre y agitacion den casi tur sector den comercio. Esaki ta debi na, segun ATIA, cu e cambionan ta contene hopi falta di claridad, un cantidad di contradiccion den e nota di splicacion y sin kita afo cu ta considera cu DIMP mes a duna masha poco informacion y guia na comercio. Den practica, segun comercio, cu den mayoria di e leynan nobo aki no a tene e realidad na cuenta, cu na su turno ta crea un conducta evasivo.
Ta cu e realidad aki riba mesa, ATIA ta desea di haya e oportunidad pa reuni cu directiva di DIMP, pa hunto discuti y “brainstorm” riba varios punto cu por haci ehecucion di e ley fiscal mas eficiente y practico.
Probechando di e oportunidad, ATIA kier mas informacion relaciona cu introduccion di cobransa di BBO na frontera, cu ta plania pa drenta na vigor dia 1 di juni 2023. E organisacion ta pidi DIMP pa manda nan copia di e cambio den e ley specifico aki, esta di cobra BBO for di momento di importacion, pa asina ATIA por ta miho prepara den e reunion.
ATIA ta sperando keto bay riba un contesta di DIMP pa e reunion aki. Asina nan por garantisa miho communicacion, mas comprendemento y pa ATIA ta un partner strategico di DIMP den ehecucion di e cambionan di ley fiscal.
Loading…
Reload document 
Open in new tab 
