Un total di 10 persona indocumenta a purba drenta Aruba di forma ilegal ayera nochi, procedente for di Venezuela. Ora wardacosta a duna nan instruccion pa para, nan a purba huy. Nan tabata zuidoost na cabes di Aruba ora cu e patruya di wardacosta a los tiro riba nan, den un esfuerso pa paga e motornan di boto. A logra tambe y asina a aborda e boto y trece tur na e base di Kustwacht na Marinierskazerne na Savaneta.
Diabierna prome cu 11:00pm Polisnan den e “radarkamer” a tuma nota di un boto biniendo Aruba for di Venezuela na 7 miya di distancia, cu velocidad halto. Mesora a informa wardacosta cu a activa un avion y nan botonan metalshark pa bay topa cu ne. Mientrastanto polis a haci uzo di nan helicopter tambe pa tin un wowo extra den halto, mientras cu a spacha varios unidad di polis pa e area di Lago Colony.
“Nos ta considera e accion di awe nochi un succes”, asina Randy Paskel, hefe di wardacosta na Aruba a duna di conoce un rato pasa pa 2:00am, durante un encuentro cu prensa na e pier di wardacosta na e base militar na Savaneta. Ey a trece e boto, e capitan, tripulante y e 10 pasaheronan indocumenta, pa por procesa nan. Separa di wardacosta, tambe polisnan y warda nos costa ta envolvi den e accion aki, sea ta pa e trabou di investigacion penal of di procesamento di e ilegalnan pendiente nan deportacion.
Wardacosta ta riba un alerta pisa e ultimo temponan aki, mirando e situacion politico fastioso cu tin na nos pais bisiña. Un di e metanan di wardacosta ta pa garantisa cu nos costanan ta sigur y nos fronteranan cera pa evita mas di e tipo di botonan asina cu ta yega Aruba cu cantidad di ilegal abordo cu ta bin pa busca un miho porvenir riba nos isla. Den e simannan cu ta bin lo nota mas presencia di patruyanan na costa, cu jeepnan special cu wardacosta, polis y hasta militarnan den nan.
