E ola di maldad cu ta creciendo tur dia riba e mundo aki ta pone cu hende mester tene bon cuenta tras di kico bo ta sigui , ken ta bo modelo di bida, ken bo ta imitando, tras di ken bo ta cana y na ken bo ta entrega bo curason tanto fisico como spiritual.
Pasobra engaño ta aumenta dia tras dia y hopi ta kere den e famoso bida priva, cua ta conta solamente pa nos cu ta ser humano, pero dilanti di Dios ningun ser humano tin bida priva. Pero keto bay bo ta nota hende ta haci robes, rechasa palabra di Dios, perde temor di Dios, reta Dios cu nan actuacion y pensamento, biba den inmoralidad y scuridad y bisa cu ta nan bida priva.
Esaki ta un echo doloroso caminda hende ta demostra falta di conocemento y ignorancia. Mayor mester instrui nan yiunan for di chiki, bisando cu no laga ningun hende gaña boso. Dilanti di Dios no tin bida priva, pero tur cos ta habri den bista di Esun na cual nos tin di duna cuenta (Hebreonan 4:13).
Ta tristo ora nos mira hende grandi ta haci tur locual ta posibel pa gaña nan mes y sigui biba den infieldad, inmoralidad y fantasia den e mundo di scuridad, cu cua e enemigo ta ciega hende pa nan continua den dje.
Ta deber di cada mayor pa instrui nan yiu den e caminda di decencia y respet pa nan acepta den nan bida y biba drechi for di nan edad jong, pero ora e ehempel ey no ta exisiti, pasobra e mayor a permiti diabel corumpi su curason cu inmoralidad, infieldad,e mayor mes ta crea un tereno pa rebeldia di parti su yiu, cu lo pone e mucha trompica.
Den Proverbionan 16 vers 25 ta skirbi: Tin un caminda cu ta parce bon den bista di hende, ma su fin ta e caminda di morto.
Y tur hende tin e oportunidad den nan bida pa realisa den cua caminda nan kier cana.
Bo no tin mester di laga hende hala bo atencion pa despues bo bisa hende a husgabo.
Pasobra esey tambe ta na moda; haci cos robes, bay completamente for di e boluntad y decencia di Dios y despues bisa cu hende ta husga bo.
Bijbel ta bisa bon cla pa nos no laga ningun hende gaña nos pasobra tur locual hende sembra hende lo cosecha. Hende mester ta consciente na unda nan ta entrega nan curason, pasobra sin bo sa bo ta cay den trampa di e enemigo.
Den Salmo 51 vers 10 ta skirbi: Crea den mi un curason limpi, O Dios y renoba un Spirito recto den mi.
Salmo 139 vers 4 ta para scirbi: Prome cu tin un palabra riba mi lenga, ya Bo conoce esaki caba, Oh Señor. Na unda mi por bay for di bo Spirito of na unda mi por huy bay for di Bo presencia?
Ora materialismo, arogancia, orguyo, amargura, inmoralidad ta domina y controla bo bida, e miho conseho ta pa entrega bo bida na Señor, arepenti di maldad y corda kico Señor a priminti den Mateo 11 vers 28.
Nos ta bibando den tempo trabahoso, caminda hende tur dia ta wordo engaña; tanto hende grandi como e hobennan. Den un mudo caminda maldad ta wordo programa y den cua hende a perde temor di Dios.
Den Mateo 5 :8 ta skirbi: Bendiciona ta esnan di curason puro, pasobra nan lo mira Dios.
