Tabata den pleno marduga di diaranson manece diahuebs cu ambos compania di utilidad a faya nos pueblo atrobe, interumpiendo suministro di coriente. Memey awasero y calor, a laga consumidonan sufri pa rato sin coriente y sin por descansa. Tur esaki mientras comunidad ta poniendo presion pisa riba Minister di Energia, Glenbert Croes, pa asumi un posicion mas activo den identifica e problema y busca solucion duradero.
E anochi a cuminsa cu un pal’i luz cu a pega na candela na Jan Flemming. Esey a causa cu un area den e bario a perde coriente. Con un pal’i luz por pega na candela, no ta conoci, pero pa 12:54am a reestablece coriente bek.
E paz energetico no a dura mucho, pasobra pa 4:00 am atrobe e districto di Santa Cruz a perde coriente. ELMAR ta culpa WEB pa esaki, debi na un fayo eyden cu no por a cumpli mas cu e demanda pa distribucion cu consecuencia cu Santa Cruz y Savaneta a keda den scur. Pa 4:45 am a reestablece suministro atrobe.
Pero ni un ora despues, ata fayo den coriente atrobe, e biaha aki den e barionan di Tamarijn, Sero Pita y vecindario. ELMAR a constata cu su kabelnan di coriente a cay na Sero Pita cu a causa cu coriente a bay. Mester a lanta su ekipo di “lineman” fo’i soño pa core kabel di nobo prome cu por reestablece suministro atrobe.
No ta mucho dia pasa cu WEB a celebra cu a tuma e planta Recip completamente over di Wartsila. A menciona inversion multimiyonario den planta moderno precisamente pa garantisa miho suministro. Gobierno a contrata e compania MPR di Merca pa a investiga e problemanan den WEB cu ta ocaciona fayo, y segun WEB, a sigui tur e consehonan y cu no lo tin fayo mas. Despues ta na ELMAR a cuminsa experencia fayo sigui tras di otro pa cual MPR a bin atrobe pa investiga ELMAR, pero di luna pasa pa awo casi tur dia tin problema cu suministro di coriente.
E locual cu a sosode awe marduga ta netamente e problema di falta di mantencion di e red di coriente cu ta ocaciona fayo. Utilities Aruba a forsa e companianan pa saca placa na dividendo en bes di inverti den mantencion preventivo y corectivo. Awe comunidad ta paga e prijs! Pero faltando un aña pa eleccion, e fayonan aki por tin consecuencia politico, pa cual e gobierno na mando ta hay’e bou presion di votadonan pasobra tarifa di awa y coriente ta sigui bon halto pero e servicio ta deficiente!
