Diamars mainta, algo pasa di 9:00 am, DOW a pidi presencia di polis pa intermedia den situacion di construccion ilegal. Situacion a bira tenso na momneto cu e trahadonan a lanta cu personal di DOW na e sitio.
Na Caya Tumba, cerca di gasolin station band’i Sasaki, un comerciante tabata den proceso pa construi un afdak banda di su warehouse. E afdak tabata pega cu cura banda di caya. DOW lo a avisa e doño di e edficio cu esey no por. Pero na yegada a bin constata cu e construccion di dicho afdak asina mes a cuminsa tuma luga.
Awe DOW a bin cu team completo pa nan mes baha e structura abou. E doño di e warehouse a lock porta di cura y no laga ningun hende drenta su tereno. Polis a yega pa intermedia den e situacion. Na final e doño di e warehouse a rasona y duna ordo na e trahadonan baha shete balki di palo abou y asina cuminsa desmatela e afdak ilegal aki.
