Carnaval ta un epoca hopi gusta. Pa forma parti n’e celebracion di carnaval, MetaCorp a organisa un jump in pa su empleadonan. ’N Fuzion tabata presente pa pone ambiente, pa pone tur hende baila na Balashi Beer Garden.
Eddie de Veer, CEO di MetaCorp Aruba, a expresa cu nan a cera e aña cu pagara y a habri e aña cu jump in p’e compania. E Rubianonan gusta un carnaval, y p’e empleadonan di MetaCorp esaki no tabata un excepcion. Nan a pidi pa un jump in. Awe por a mira con e empleadonan ta disfruta di nan jump in.
Pa de Veer semper ta un placer di mira e empleadonan contento. El a splica cu diaranson nan tabatin inscripcion p’e MetaFit y esaki tabata grandi. Ya caba nan tin mas di mil hende cu a inscribi y esaki ta inclui e empleadonan.
Diahuebs nan ta disfruta di jump in. Cada bes cu ta mira e empleadonan contento cu e actividadnan organisa, esey ta motiva gerencia di MetaCorp pa haci mas. “Awe no ta pa mi, awe ta pa nan. Mi kier a djis nos trahadonan un danki grandi, esaki ta un aprecio chikito pa nan warm up pa e carnaval. Mi ta spera nan disfruta di esey den un sano huicio”, de Veer a expresa. El a expresa cu si nan bebe pa no stuur.
Rowald Werleman di MetaCorp a expresa cu mas o menos 400 empleado tabata presente. No tur por tabata presente, debi cu nan mester a cumpli cu nan trabou manera esunnan di Gloria. Aparte di tin ambiente cu ’N Fuzion, cada compania di MetaCorp a manda un representante como reina di cual a saca un ganado. Un di e topiconan tabata cu e t-shirt mester tabata decora cu algo recicla.
Seferina Krozendijk a representa Apex y su trahe tabata traha cu saco di cement cu lastik y cabuya di hero. Tur esaki tabata haci hunto cu su coleganan. Dialuna nan a bin cu e idea, di cual a cuminsa traha riba e trahe diamars y a finalis’e diahuebs.
Shari Geerman a representa Apex a expresa cu su coleganan/fanatico a sosten’e desde prome dia y e ta gradici na nan. Su trahe tabata un mescla carnavalesco cu piedra di Apex y santo.
Kimberly Dammerman a representa ATCO Aruba, cu bou di nan tin EcoTech, EcoFreezone, EcoGas y Atco. Su trahe a representa tur loke nan ta haci, cu ta recicla. A haci uzo di saco, papel di carton entre otro.
