Diahuebs atardi Colegio Pastoor Kranwinkel a tene nan parada escolar. Antes tabata tene un jump in na scol incluso eleccion di reina, pero durante e añanan esaki a cambia y awo ta tene parada di scol.
Manera aña pasa, un biaha mas a conta cu Youth Xtreme, cu ta compaña nan pa algun aña, pa pone ambiente p’e muchanan. Angeline Leung, cabesante, a indica cu nan a pone mas o menos 200 mucha riba caya y manera semper ta ambiente so tin durante parada. Ruta di e parada ta sali desde scol, lora n’e prome birada y pasa banda di santana, bira pasa banda di Great Rich y subi caminda grandi. Yega te rotonde y bira bay direccion scol unda esaki ta termina.
E muchanan a gusta y a pasa hopi bon. El a indica cu semper nan ta gosa di e parada. E tema di e aña aki tabata elemento, unda por a mira yen awa y candela.
E mayornan ta esunnan cu a haci tur cos posibel unda a prepara e disfraznan di e muchanan. Tambe tur maestro tabata presente como algun boluntario cu ta familiar, mayor of ex-alumno cu a yuda cu e parada.
Leung a expresa pa semper celebra na un forma responsabel y cuida bon e muchanan, pa tin sunblock, tin suficiente cos di bebe. Tambe p’e adultonan ta e miho ehempel p’e muchanan. El a gradici tur sponsor, mayor y comision di carnaval pa haci e actividad aki uno posibel.
