Stichting MUSICA hunto cu SMAC siman cu tabata tras di lomba tabatin un reunion cu minister di Cultura Xiomara Maduro. E preocupacion general den e encuentro aki tabata kico lo pasa den luna di juli cu carnaval di Aruba. A pospone su celebracion den luna di januari / februari pa juli. Sinembargo tur cos ta mustra cu esaki no ta posibel mas. Si no tin parada, con ta bay para cu e festivalnan.
Edwina Werleman, presidente di Stichting MUSICA, a splica cu e reunion tabata amplio pasobra no solamente a papia di e aña 2021 sino pa 2022 tambe. Na e momentonan aki organisa algo den luna di juli, el a bisa, no ta posibel mas mirando e desaroyo di ultimo lunanan cu tur e protocolnan cu mester a respeta.
Ta keda e pregunta kico ta bay pasa cu Festival di Caiso y Soca, cu ta forma parti di e temporada di carnaval.
Pa cuminsa, Aruba ta den temporada di Cuaresma y esaki ta algo cu mester respeta, Werleman a bisa. Aworaki no ta bay tin nada. Despues di e periodo aki lo bay sinta cu musiconan wak kico por haci. El a mustra riba loke a sosode pa Himno y Bandera, unda cu pa dos aña caba ta tuma luga e festival virtual. Despues di Cuaresma ta caba di concretisa e plannan cu e musiconan, cu ta esnan cu ta dicidi. Te cu aña pasa ora a papia di pospone e parada of e celebracion di carnaval, e musiconan tabatin interes pa organisa algo memey di aña. “E interes ta enorme y no kier mira cu e festival ta keda un aña sin wordo organisa. Pero mester tene cuenta cu tin hopi contratempo y e programanan virtual ta locual ta bay concretisa cu nan. Ta pendiente pa caba di planea cu e musiconan kico ta bay haci. E lo ta atrabes di aña 2021 hibando nos pa 2022.”
Tambe nan ta compronde cu sin e apoyo di comercio y Departamento di Cultura, un festival lo no ta posibel. Tabatin combersacion caba cu partnernan manera SETAR, probablemente lo por conta cu Departamento di Cultura, lo ta posibel pa haci algo. Tur esaki basa riba un presupuesto realistico.
Kico ta bay sosode den 2022, ta depende di tur loke e vacuna lo duna como resultado. Un festival di e taya y magnitud cu semper a conoce, e no ta mira posibel den 2022. “Pero nos no ta descarta cu si nos por tin programanan virtual, cu mentenan creativo, poniendo grupo y partnernan hunto, lo por tin algo den estilo virtual. Pero tur cos ta depende di nos musiconan, cu ta esnan cu tin e ultimo palabra. Nos lo no sinta keto y laga e aña pasa sin haci nada. Nos lo tene nos promocionnan, segun por y cu apoyo di comercio.”
E carnaval si a descarta caba cu e no por tuma luga manera e plan tabata. Pero si no ta descarta un festival.
