Dia aden, dia afo mundo henter ta confronta cu acontecimento nobo relaciona cu e virus di COVID-19. Recientemente a bin tuma nota cu a surgi un variante nobo un biaha mas di Coronavirus. Ta trata aki di Omicron, esta un variante procedente di Sur Africa cu ya a propaga pa Europa. Den cuadro di esaki, e gobiernonan rond mundo ta introduciendo medida y mandato pa asina purba preveni un otro ola di e virus aki.
Den tur esaki, Movimiento Pro Derecho Humano a bin pa dilanti awe mainta pa adresa algun punto cu nan ta haya di suma importancia relaciona cu e medidanan en cuestion. Asina a haci un yamada na e gobierno di Aruba riba e posibel medidanan cu nan lo bay introduci e siman aki. Jennyfer van Gelder, miembro di e grupo a splica cu nan no ta contra di e vacuna di COVID-19, pues ta di opinion cu ta keda na cada ken pa dicidi si ta tuma esaki of no.
A sigui splica cu locual nan ta boga p’e ta mas clarificacion di e informacion difundi p’e instancianan concerni riba loke ta trata ambos vacuna como tambe cualkier ‘booster shot’. Locual nan kier subraya tambe ta cu mayoria vacuna ta tuma alrededor di dies pa diescinco aña pa produci, segun van Gelder, mientras cu esun aki tabata cla den un periodo di ocho luna. Tambe ta cuestiona dicon no tin mas enfoke riba movecion y comemento saludabel.
Tambe ta importante pa e grupo pa tur trahado ta na altura di nan derechonan riba trabou pa loke ta trata vacunacion. Pues, ningun hende por obliga un persona vacuna, segun van Gelder. Un otro punto cu nan a trece pa dilanti ta esun di e posibel introduccion di un QR code, cual lo nifica mas restriccion pa e personanan cu no ta vacuna pero tambe pa esunnan cu ta vacuna caba. Segun van Gelder, esaki lo nifica mas control di gobierno y lo por trece un tipo di discriminacion riba persona vacuna y no vacuna.
Por ultimo, Zulaika Croes-Dirksz, otro miembro di Movimiento Pro Derecho Humano, tambe a trece e mesun preocupacionnan aki pa dilanti. Asina a bin haci un yamada na comunidad henter y tur grupo cu ta para pa derecho di humano pa reuni dia 10 di december, dia internacional di derecho humano, riba Julianaplein pa 3:30 pm pa cana bay parlamento y entrega un manifiesto. Cu esaki kier demostra na gobierno cu nan ta para pa libertad.
Pa cobertura mas amplio lesa edicion di TREMPAN mañan.
