Diadomingo, 28 di november a tuma luga e di dos edicion di Kiwanis Ride4Kids Challege, un iniciativa pa recauda fondo pa duna aporte na nos comunidad, specialmente n’e muchanan den necesidad.
Segun Giovanni C.V. Bermudez, presidente di e PR Committe, a comenta cu tabatin 12 fellow Kiwanians cu colectivamente a core 555 kilometer.
Presidente di Kiwanis Club of Palm Beach, Rothmar Coenraad a core 150 kilometer y e otronan a varia entre 100 te cu 15 kilometer, cual ta e ultimo stretch cu a tira fo’i Malmok te cu e Clubhuis di Kiwanis Palm Beach.
Di e club mes 12 persona a participa. Fuera di esey 6 otro ciclista a participa cu no ta miembro di e club, amigo di e ciclistanan cu a yuda den e proceso pa sostene e careda.
Esaki ta e di 2 edicion di Ride4Kids y ta spera otro aña p’e di tres edicion. E fondo recauda di e proyecto aki pa cada kilometer patrocina, lo ta uza pa cubri gasto di schoolgeld pa un grupo di mucha cu ta cay bao di SKOA, cu lamentablemente door di situacion cu ta conoci, no por paga nan schoolgeld. Esaki a hacie meramente pa recauda e fondonan y pa yuda e schoolgeld di e muchanan aki.
Presidente di Kiwanis Club of Palm Beach, Rothmar Coenraad a comenta cu esaki ta un iniciativa cu a cuminsa aña pasa. Den e pandemia a pensa kico por haci pa recauda fondo. Kiwanis ta un club cu ta depende di fondo pa por haci nan proyectonan. Naturalmente cu e pandemia, esaki tabata un di e formanan cu por a hacie. Aña pasa tres miembro a entiasama masha hopi mes, pero p’e aña aki mas miembro a bin sostene e causa.
E ambiente tabata fenomenal. Fo’i trempan tabatin hende pa nan sosten. E otronan a percura pa awa y powerade. Coenraad a menciona di ta hopi gradicido como presidente y cu e tin un club cu sigur a sostene e iniciativa aki completo.
