Despues di algun luna di trabou intenso pa mantene e edificio monumental di Directie Volksgezondheid Aruba (DVG), esun conoci como ex-Landslaboratorium, awor ta asina leu cu Monumentenbureau por anuncia cu e proyecto ta cla. Cu presencia di empleadonan di DVG, Albo Aruba N.V. y Monumentenbureau, e project manager di Albo Aruba N.V., Anno Postma y director di Monumentenbureau, Yvonne Webb-Kock, a firma e proces-verbaal pa finalisacion di e proyecto.
Despues cu a caba di firma, a entrega e yabi na management team di Directie Volksgezondheid. Empleadonan di DVG a keda contento y gradicido con bunita e interior di e edificio a keda. Sigur cumpliendo cu deseonan y detayenan moderno y un ambiente di trabou agradabel. Monumentenbureau ta gradici Directie Volksgezondheid Aruba pa e confiansa duna pa realisa e proyecto di mantencion.
Asina cu aloca e fondonan, lo sigui cu e di dos fase di mantencion di e edificio monumental. Monumentenbureau a enfatisa cu e proyecto aki lo no por tabata posibel sin sosten di Minister di Finansas, Economia y Cultura, Albo Aruba N.V., Serfix Installation Techniques y Ranvic N.V.
Monumentenbureau ta gradici Minister di Salubridad, Deporte y Turismo, Dangui Oduber, pa aloca fondo pa por a renoba y mantene e edificio di Directie Volksgezondheid Aruba (DVG) conoci como e ex-landslaboratorium. Monumentenbureau ta sigui aporta na mantencion di nos monumentonan.
