Diadomingo mainta, Kibaima 40+ a batisa nan uniform. Joy, Efrem y Nel Orman, hunto cu Tan Dijkhoff y Tirso Tromp a funda e ekipo. Kibaima tin 42 aña di existencia y a conoce un record di campeon den Softball Fastpitch, Softball Bush League.
Kelly mes tin 8 aña na cabes di e ekipo. Te awo ta batisa nan uniform. Door di e inconveniencia di COVID, por fin ta logra asina leu. Kelly ta gradici Spotless pa su confiansa den e ekipo como sponsor.
Kelly ta conta cu ultimo biaha den 2020 nan a sali campeon den Copa Navideño. Den 2019 a cay na di tres luga den Liga. E ta consisti di cuater team. Y na su turno e cuater teamnan ta bay representa Aruba den Copa ABC.
Campeonato di liga ta dura dies siman y despues ta cuminsa Copa Navideño. Tur hende den liga 40+ ta participa.
E pandemia ainda t’ey. Sinembargo deporte ta algo hopi bon pa salud. Kelly ta invita pa tur hende bin Maria Maai riba veld di Olympic y bin apoya e atletanan di 40, 50 y 60+ awe. Deporte ta bon pa salud y ta bon pa condicion.
Si bo no tin nada di haci na cas, yega veld di Olympic y pasa un dia dibertido.
