Ta parce cu huurdonan di e casnan situa den e compleho “Merlot Villas Aruba” situa na Saliña Cerca # 47 na Palm Beach no ta compronde cu eyden tin otro hende tambe ta biba. Mescos cu rond di e casnan di huur aki, tin casnan regular tambe den cual fama ta biba, drumi y lanta pa bay traha. Awe marduga polis mester a bolbe bay eynan pasobra zonido duro di musica y harimento tabata stroba e paz den e bario.
Tabata despues di 1:00am cu Polis a yega “Merlot Villas Aruba” pa responde riba keho di bisiñanan cu no por drumi pasobra a horta trankilidad den e bario. Na yegada tabata dificil pa drenta paden pasobra e cura ta cera y mester un codigo pa por habrie. Asina mes un polis tabatin e codigo y a logra drenta y yega na e cas specifico unda berdad por a constata cu e fiesta tabata den “full swing”.
Ey a papia cu e huurdo di e cas, cu mesora a mustra comprension pa e situacion y a acepta cu berdad e musica ta un poco duro y cu lo pidi e bishitantenan pa pasa paden di e cas y asina evita zonido pafo. A splica nan cu separa di fiesta, cu na Saliña Cerca tin hende ta biba tambe y cu mester di nan sosiego pa por bay trabou su mañan. A keda di pasa e problema aki pa “Polis di Bario” tambe pa papia cu doño di e compleho pa splic’e di e molester cu su casnan cu e ta huur ta causando cas tur fin di siman pa e vecindario.
