Diasabra anochi laat, polis a bay na un cas situa den Weg Rooi Hundo pa un caso di ladronicia. E denunciante, un dama, a bati alarma, mirando cu el a mira hende den su cas, y e no a confia. El a prefera di yama autoridad pa atende cu e asunto.
Na e sitio, a tuma nota cu ladronnan a horta un cartera cu no menos di 3 mil florin den dje. Despues di un buskeda rond di e cas, a bin topa cu un paticabra, cu probablemente a uza pa a forsa e porta y drenta den cas.
Polis a conseha e señora pa pasa ward’i polis pa e haci un keho oficial na recherche. Mester cuminsa un investigacion mas profundo pa por yega na e ladron aki. Asina mes, cualkier bisiña of persona den vecindario cu por a nota movecion straño, of hende canando cu paticabra den man of cara desconoci den bario, yama polis y laga un tip. Tur informacion por yuda pa e señora por logra recobra su placa bek!
