Diamars mainta parlamento a trata varios topico cu tabatin riba agenda. Un di esakinan tabata un ley di loonsubsidie. Esaki tabata un ratificacion di un ley introduci aña pasa caba ora cu e pandemia a yega Aruba pa asina duna tur negoshante un alivio pa hende no perde trabou masalmente y percura pa economia por keda draai.
Den esaki mr. Geoffrey Wever, minister di economia a splica cu e ley a pasa unanimamente, cual ta nifica cu a formalisa e ley aki di forma retroactivo, pues esaki ya ful e loonsubsidieregeling tabata den ehecucion y a yega su final tambe. Pero constitucionalmente mester a regla esaki y inclui cu e ayudo financiero aki tabata ‘schenking’ y p’esey mester cana su proceso formal.
Wever a sigui splica cu mas tanto e discusion cu a tuma luga awe den parlamento tabata relaciona cu e grupo di negoshante cu mester paga bek na gobierno. Pa aña 2020, Wever a bisa cu tin alrededor di 75 miyon pa cobra bek, esta un suma cu a paga di mas na cierto compania y un suma di 10.8 miyon cu tabata paga di menos of cu ta den verrekening, pues suma cu mester paga ainda na cierto empresario. Tambe tin un suma di mas of menos 11 miyon den obhecion, esta cu SVB of gobierno ta bisa cu cierto compania mester paga bek pero cu e companianan ta bisa cu nan a pidi loonsubsidie corectamente y cu nan no tin obligacion pa paga esaki bek.
Tur esakinan sigur ta sumanan hopi grandi y specialmente pa un pais den un situacion financiero preocupante segun Wever a agrega. A añadi bisando cu Hulanda a pone como condicion pa busca e placa paga di mas aki bek y diamars a duna e minister e hermentnan pa cuminsa cobra esakinan bek. Segun Wever, a base di areglo di pago lo bay pidi cada compania pa paga e sumanan aki, asina aki evitando cu ta kibra comercio y percurando p’e companianan keda existente.
Pa cobertura mas amplio, lesa edicion di TREMPAN mañan.
