Dia 28 di april, Landsrecherche a detene Franklin A. Abath den e investigacion Avestruz.
Desde 11 april ultimo Landsrecherche a haci un total di seis detencion den cuadro di e investigacion di delitonan di corupcion posiblemente cometi y otro hechonan castigabel relaciona cu otorgamento di terenonan di gobierno entre 2009 y 2017. E dos sospechosonan Leoncita Arends como tambe Franklin Abath ta deteni ainda.
E expectativa ta cu e investigacion lo ta cla den poco tempo y cu lo entrega e proces-verbaal final na Ministerio Publico. Den e periodo venidero lo tin algun detencion mas.
E CASO AVESTRUZ
Ministerio Publico a informa dia 2 di october 2019, dia cu a haci e huiszoekingnan, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.
