Diabierna a tuma luga e Ceremonia di Condecoracion Real den Grand ballroom di Marriott na unda cu Gobernador di nos Pais, Señor Alfonso Boekhoudt a condecora 33 ciudadano di Aruba cu den diferente sector a contribui boluntariamente na Pais Aruba.
Presente na e ocacion aki tawata Presidente di Parlamento, Señor Ady Thijsen, Prome Minister Evelyn Wever-Croes, Minister Xiomara Maduro, Mininster Armando Lampe y Minister Glenbert Croes kendenan cu honor a compaña representantenan di Comision Condecoracion Real Aruba.
Prome Minister a gradici e comision encarga cu Condecoracion Real na Aruba pa e trabou bunita cu nan ta eherce pa percura cu nos ciudadanonan ricibi un honor asina bunita. Prome a expresa su satisfacion di e cantidad di ciudadanonan cu un biaha mas a ricibi un condecoracion. Desde e prome aña di gobernacion di Gabinete Wever-Croes, a stimula aplicacionnan pa e reconocemento grandi y bunita aki, mirando cu no ta hopi hende tabata conoce e proceduraanteriormente.
“Mi ta felicita cada ciudadano di nos pais cu e aña aki a wordo condecora pa e trabounan excelente cu nan ta eherce pa nos comunidad. Mi deseo ta pa otro aña mas ciudadano di nos pais wordo condecora como gradicimento pa e trabounan boluntario cu nan ta haci pa nos pais”, Prome Minister a expresa.
