Ministerio Publico a dicidi recientemente pa cera (seponeer) un caso penal contra agente policial Ashwin Martis, kende tabata envolvi den un tiroteo caminda un persona a resulta herida riba 10 di maart ultimo. Tanto e agente policial en cuestion como e victima a wordo poni na altura di e decision aki. Ministerio Publico a informa Altocomisario di Polis tambe.
E incidente a sosode durante un persecucion na pia entre dos agente policial y dos persona despues di melding di un kiebro den un edificio na San Nicolas.
Ministerio Publico ta conclui a base di e investigacion di Landsrecherche cu e agente policial en cuestion a saca su arma di servicio di su holster. Mesora despues e tabata kier a hinca e arma bek den e holster. Na momento cu el a hinca e arma bek, un tiro a sali cu a alcansa e victima.
E investigacion no ta conclui cu e agente policial a los tiro intencionalmente y dirigi riba e victima. Pa e motibo ey e no por ten’e penalmente responsabel y a seponeer e caso.
