Diabierna marduga a sosode un caso di tiramento den caya di San Nicolas. Polis a ricibi informacion di un caso sospechoso n’un cas conoci pa nan. No ta mucho dia pasa cu polis y marechaussee a tene un entrada hudicial n’e dicho cas den Rembrandtstraat (hanchi).
E dia ey a bay cu varios dama di bida y traspasa nan pa Guarda Nos Costa mientras a detene un hende homber bou sospechoso di contrabanda di hende.
Na yegada di polis, a hay’e confronta cu un grupo di hoben di Village, segun informacion ricibi. Cos a bay asina leu cu e agente, Ashwin Martis a sintie den peliger cu el a saca su arma reglamentario y los un tiro. Con el a punta e arma, ki mishi e arma den su man, a mira e otro persona cu arma, ta puntonan cu Landsrecherche lo saca afo si e polis di rango “brigadier” a actua corecto of no.
Riba un video cu a circula riba WhatsApp por mira con e polis a actua despues di e tiro, cu e victima na suela ta pidi ayudo. Su colega tabata na careda pa bati alarma y yama ambulance.
E victima no ta den un estado critico, sinembargo ta den situacion di atencion.
Ora tipo di casonan asina tuma luga, Cuerpo Policial ta tuma distancia y ta laga Landsrecherche haci e investigacion, asina ta evita cu ta “tapa” pa colega. Ta locual a sosode tambe.
Diabierna merdia Landsrecherche a invita ambos agente pa un supuesto “combersacion” na nan oficina situa den Vondellaan. E colega no a keda largo. Pa atardi ya el a bay cas. Sinembargo, Ashwin Martis a keda te den oranan di anochi den e oficina di Landsrecherche. E echo ta si cu; a start un asina yama “feiten onderzoek” contra dje p’asina saca afo si Martis a actua corecto of no.
Ashwin Martis recien a ricibi su promocion como “brigadier.” Kico el a declara na e recherchenan no ta conoci. Si su colega a kim’e of no tampoco ta conoci, ta duna espacio pa Landsrecherche haci nan trabou. Pa awo, e ta na cas y no por presenta na trabou, mirando cu a kita su arma fo’i dje.
