San Nicolas Business Association (SNBA) no por sinta man crusa sin haci nada. Tempo ta pasa y ainda Secrets ta paralisa. “E proceso legal cu tin andando ta stagna continuacion y ta trece su peligronan cu ne. Un di esnan mas importante ta e parti financiero,” e presidente di San Nicolas Business Association (SNBA) a bisa.
Tin grupo di hende cu ta traha den e proyecto. Pero tambe tin cu realisa cu si e desaroyadonan no logra nan meta di habri nan portanan manera programa, e lo tin un embergadura fastioso.
P’esey, segun Errol de Freitas, a dicidi di anuncia inicio di un campaña pa recoge firma na fabor di e proyecto hotelero Secrets of Baby Beach cu ta situa den Sero Colorado.
Lema di e accion di firma ta “Say Yes to Secrets” y e meta tras di esaki ta pa “Say Yes to San Nicolas” tambe, segun de Freitas a splica den e conferencia di prensa cu a tuma luga na Kulture Cafe, na San Nicolas.
Aunke cu pariba di brug, specialmente San Nicolas, tin atencion di Gobierno toch SNBA ta sinti cu e falta accion. E accion aki no ta solamente pa e proyecto pero tur e barionan pariba di brug, cu ta pasa den un situacion dificil ultimo añanan.
A dicidi di tuma e decision pa bay den pueblo y pulsa na mesun momento nan pensamento riba e proyecto di Secrets. Na prome luga ta pidi apoyo pa e proyecto.
E lista cu ta pasa rond cu ne ta pidi pa nomber, email y number di telefon. Di e forma aki por keda den contacto cu tur hende cu a expresa, por medio di nan firma, apoyo na e proyecto hotelero su continuacion.
E informacion ta importante pa ora cu entrega esaki na autoridadnan concerni pa demostra cu e tin e apoyo necesario den pueblo.
Ademas di personanan cu ta bay den contacto cu ciudadanonan, tambe por acerca miembronan di directiva di SNBA pa pone firma riba e lista. Ta posibel pa firma esaki den forma digitalmente pa cual por subi e website di SNBA pa yena e informacionnan necesario, den e proximo dos dianan.
Lo sigui cu e accion di firma te cu rond di dia 28 di augustus. Y lo promove esaki via di digi-boardnan rond di e isla.
De Freitas a enfatisa cu e proyecto aki ta di gran importancia pa San Nicolas Historicamente, refineria a hunga un rol importante den economia di Aruba y a trece progreso pa San Nicolas y bisindario. Si el a keda, den 2024 lo a celebra 100 aña cu a estableci riba e isla.
Mundo y situacion na Aruba ta cambia. A concentra riba turismo, cu ta hunga un rol importante pa Aruba y e isla ta den top na mundo. Mayoria hende ta traha den e sector aki. Y San Nicolas tin e espacio pa un proyecto asina grandi.
Desaroyado di Secrets mes a tene un presentacion algun tempo atras pa comercio di loke e hotel lo bira. Asina a bin sali afo cu nan ta doño di un cadena masha grandi y Hyatt lo bay opera e hotel. Ta un nomber grandi mundialmente, doño di entre otro Apple Vacations. Esaki ya caba ta garantia di exito. A tuma un reto pa bini cu un hotel den un area no desaroya. E ta mustra e confiansa cu tin den esaki.
SNBA no ta compronde pakico tin tanto problema pa cu realisacion di e proyecto aki. E ta un hotel tin cinco infinity pool unda tur premium drinks ta disponibel y cu den su prome aña so tin un spinoff di 30 miyon florin. E ta habri entre 600 pa 800 cupo di trabou cu despues lo yega te na 1000 empleado.
“E proyecto aki no ta algo di discuti. Mi tin simpatia pa e posicion di e bisiñanan cu ta keha, pero te unda ta bay yega pasobra ta papia di un proyecto di interes nacional. E por ta e prome paso pa cambia direccion di pariba y San Nicolas. Mester percura pa tin algo cu ta trece fluho di hende y placa pa e area en cuestion.”
Informacion cu e ta dispone di dje ta mustra cu for di momento cu economia di San Nicolas a cuminsa cay, rond di 4 mil hende a muda y a bay biba den otro areanan di e isla. A causa cierre di negoshi y scolnan. “Mi ta pidi pueblo para tras di e proyecto y San Nicolas, ya cu Secrets lo percura pa un calidad di turismo halto.”
Niun hende mester lubida cu San Nicolas pa hopi decada a carga e isla y awo mester di apoyo di tur hende, henter e isla pa realisa un proyecto cu ta importante pa e districto pero tambe pa Aruba.
Aruba ta pasa den hopi reto economicamente y financieramente. Aruba mester di inversionistanan, ya cu e lo yuda carga e economia. No por keda depende di Gobierno so. E ta e isla preferi pa establece un negoshi, sigur uno importante manera turismo.
E miedo cu ta existi den e directiva ta cu si e doño di proyecto cansa y hala atras. Ta bay haya e situacion cu tabatin cu Racetrack y Plantation. Ta hopi placa mester a paga na daño y perhuicio. Y ta te recientemente a finalisa di paga e suma envolvi. E proyecto aki den cual e suma envolvi ta mas cu 200 miyon florin. Miho cos ta pa Aruba por disfruta di e frutanan cu e hotel lo trece pa tur hende.
Sin cu e proyecto a finalisa, ya caba e tabatin su efecto. For di momento di anuncio di e construccion, inversionistanan a cuminsa cana caminda pa cumpra propiedad den e area di San Nicolas. “No por stagna e progreso aki cu ta e oportunidad pa San Nicolas. No por stop un proyecto pa doño di algun cas cu ta kehando. ”
