Na embahada di Reino na Belgica y Representacion di Reino na Union Europeo a tuma lugar recientemente un recepcion pa tuma despedi di Cedrick Tilma como representante di Aruba na Union Europeo. E recepcion a conta tambe cu presencia di Minister Plenipotenciario demisionario Juan David Yrausquin, directora di Cas di Aruba Shandra John y functionarionan di Cas di Aruba.
Minister Yrausquin den un discurso cortico a gradici Cedrick Tilma pa casi ocho aña cu ela representa Aruba na un manera digno na Union Europeo. Segun Yrausquin, durante e periodo aki, hopi porta a habri pa Aruba na Union Europeo y otro organisacionnan liga na e Union Europeo, manera OCTA. Tambe sr. Yrausquin a remarca riba e sosten for di Union Europeo pa e maneho di Aruba riba tereno di sostenibilidad.
Cedrick Tilma a repasa e añanan cu ela funciona na Bruselas y ta mira bek na un periodo hopi fructifero pa Aruba. Principalmente ela remarca riba e aña cu Aruba a carga e presidencia di OCTA y e impacto cu esaki a nifica pa nos isla.
Finalmente Cedrick tabata tin palabra di gratitud pa e sosten cu ela haya for di Representante di Reino na Union Europeo y di Cas di Aruba.
