Minister di Turismo, Transporte y Labor, mr. Wendrick Cicilia, a enfatisa cu Aruba mester sigui inverti den su producto turistico pa mantene e isla competitivo den Caribe y atrae bishitantenan cu mayor poder adkisitivo. Durante un entrevista tocante trabounan na Sero Colorado, Baby Beach y Rodgers Beach, e minister a splica cu diferente proyecto ta den pleno ehecucion y cu nan ta progresando satisfactoriamente.
Cicilia a menciona e caminda cu ta pasa dilanti di e anker y e borchi I Love Aruba, continuando te na Sero Colorado Viewpoint. Segun e minister, e inversionnan aki ta contribui na mehoracion di e experiencia turistico y bienestar di comunidad local. E minister a destaca cu Aruba tin bon hotel, restaurant y un hospitalidad cu ta distingui e isla. Sinembargo, competencia den Caribe ta fuerte, specialmente cu destinacionnan manera Corsou cu ta invertiendo activamente den turismo.
P’e motibo ey, Aruba mester mantene un producto di calidad superior, incluyendo caretera, beach y espacionan publico bon manteni. Cicilia a indica cu den presupuesto di Tourism Product Enhancement Fund (TPEF) pa 2026 tin un proposicion pa financia recap di e careteranan, cu pronto lo ta presenta na Parlamento. E minister a enfatisa cu e careteranan ta forma parti di e producto Aruba y cu nan mantencion ta esencial pa economia nacional.
Adicionalmente, Gobierno ta contempla oportunidadnan pa desaroya producto turistico nobo, specialmente den areanan relaciona cu e beachnan. Segun Cicilia, e ambicion ta pa Aruba ofrece un producto completo di nivel superior, manera el a expresa, “top of the line”. E meta ta pa Aruba sigui siendo un destinacion atractivo, moderno y competitivo pa futuro.
Pa mas detaye lesa TREMPAN.
