Colegio di supervision financiero di Aruba (CAft) ta conseha Gobierno di Aruba pa haci un escogencia fundamental tocante di e futuro di turismo y pa incorpora e escogencia aki integralmente den e presupuesto, e agenda multianual di inversion y e regulacionnan fiscal. E economia di Aruba ta asina entrelasa cu turismo cu e escogencia aki lo afecta tur minister. Turismo ta e motor principal di crecemento economico, pero na mes momento e ta e riesgo di mas grandi pa e sostenibilidad di finansa publico.
Situacion financiero economico
Desde un perspectiva economico, Aruba ainda ta bayendo bon, aunke e crecemento ta nivela despues di varios aña di recuperacion fuerte di turismo. E ultimo añanan, e ratio di debe di e sector colectivo a baha fuertemente te 64 porciento na 2025. E resultado di explotacion y e resultado di e pais ta keda positivo. Aruba ta sumamente vulnerabel pa shocknan economico; na aña 2020, por ehemplo, Aruba tawata un di e economia mas afecta. E situacion economico mundial incierto y e embehecimento di poblacion ta e riesgonan principal pa finansa publico.
Turismo: motor y riesgo
Pa hopi aña caba, turismo ta e motor principal di e economia di Aruba. E ultimo 20 aña, e actividad turistico practicamente a dobla. Crecemento continua di e cantidad di turista ta yegando na limitenan, limitenan cu por percibi caba. Tin un deficit structural riba mercado laboral, e sector di utilidad ta yegando na su limite di capacidad, tin tur biaha mas aglomeracion den trafico, y mas y mas presion riba e mercado di vivienda. E obstaculo no ta e falta di plannan, sino e implementacion di e plannan aki. CAft ta enfatisa cu considerando e espacio financiero actual, awor ta e momento pa inverti y reforma. Precisamente awor cu e presion riba finansa publico ainda ta limita.
Scoge direccion
CAft ta subraya e importancia pa Aruba di haci escogencianan awor. Si e enfoke ta riba atraccion di mas bishitante, e presion di turismo riba e pais ta aumenta ainda mas, mientras si ta enfoca riba e balor pa bishitante y diversificacion di e economia, por cera e gap (buraco) entre crecemento turistico y crecemento di prosperidad. Den e marco ey, Tourism 3.0 ta un inicio valioso di e discusion social.
Establecimento di institucionnan nobo pa duna forma na e maneho di turismo por obstaculisa maneho di turismo eficaz. Establecimento di fondonan nobo alimenta pa impuestonan aloca por conduci na fragmentacion di gastonan publico. Recientemente, Aruba a inicia e regulacion di acomodacionnan short stay. CAft ta consciente di e importancia di regulacion eficaz y enforsamento riba e area di maneho aki, y ta conseha pa duna mas forma na esaki. Hunto cu IMF, Aruba ta explorando e reemplaso di BBO pa un sistema di BTW. E implementacion di un sistema di BTW lo contribui na e ampliacion di e base pa inclui e sector informal.
