Ambulancedienst ImSan a amplia su fleta cu dos ambulance nobo. Durante e entrega oficial, Minister di Salubridad, Asunto Social, Cuido di Adulto Mayor y Maneho di Adiccion, drs. Melvin Wyatt-Ras, a resalta importancia di un servicio di ambulance profesional y prepara pa responde na necesidadnan di comunidad den situacionnan di emergencia.
Cu e dos unidadnan nobo, Ambulancedienst ImSan ta conta aworaki cu un fleta di 12 auto. E ambulancenan a wordo financia door di AZV. Segun Hefe di Ambulance, Liberato Hoek, e unidadnan ta completamente nobo, adapta na exigencianan local y certifica segun norma “Triple K”, cu ta inclui prueba di impacto. Un di e unidadnan tin e color lavender, scogi como simbolo di conscientisacion pa tur tipo di cancer.
“Na momento cu un hende mester un ambulance, e mester por conta riba un servicio cu ta responde cu capacidad y profesionalismo. No ta solamente e pashent cu ta den un momento di preocupacion; su famia tambe ta conta riba e yudansa ey. Esey ta loke nos comunidad ta spera y di nos banda nos tin responsabilidad pa duna e cuerpo di ambulance e sosten necesario pa sigui brinda e calidad di cuido cu nos pueblo merece,” Minister Wyatt-Ras a expresa.
Durante un bishita den un di e ambulancenan nobo, Minister Wyatt-Ras por a mira e ekipo cu e profesionalnan tin disponibel pa brinda cuido y stabilisa un pashent durante un emergencia, prome cu e yega hospital. Esaki ta subraya e rol importante di Ambulancedienst ImSan den cuido pre-hospitalario.
Ing. Edwin Jacobs di AZV a destaca cu durante e ultimo cinco añanan servicio di ambulance a desaroya di principalmente transporte di pashent pa hospital, pa un servicio profesional y dedica cu bon ekipo pa brinda cuido pre-hospitalario.
Pa Minister Wyatt-Ras, e servicio aki ta cuadra cu e vision di Ministerio pa un sociedad saludabel, resiliente y inclusivo, den cual cada ciudadano por conta riba cuido y sosten durante tur fase di bida, cu calidad y dignidad.
E Minister a expresa su aprecio pa e profesionalnan di Ambulancedienst ImSan y a reconoce nan dedicacion, profesionalismo y compromiso cu comunidad.
Minister Wyatt-Ras ta felicita ImSan, Hefe di Ambulance Liberato Hoek y henter e cuerpo di ambulance cu e ampliacion di nan fleta, y a enfatisa importancia di sigui traha hunto pa mantene e calidad di cuido cu pueblo di Aruba merece.
