For di basta tempo caba tin un problema cu e situacion di Rioolwaterzuiveringinstallatie (RWZI), caminda cu for di diferente luga na Aruba, awa sushi ta manifesta y ta haci cu holo malo ta circula. Hasta banda di hotelstrip por mira con e awa ta bin ariba manera un fontein, creando sigur un bista masha mahos y a-higienico.
Durante un conferencia di prensa di gobierno, minister Ursell Arends, kende ta encarga cu e cartera di medio ambiente a indica cu pa fin di maart, e plan pa pasa RWZI pa un entidad priva, e plan aki lo mester ta concretisa.
Tin un comision n’e momentonan aki ta trahando y tin e persona cu ta representa e ministerio, t’e presidente di e comision aki, cual ta ex-director di DOW, ing. Jossy Figaroa. E comision ta consisti di tres persona. Director di DOW, ing. Marlon Croes y tambe Director di Utilities, Ton Rojer. Nan tres ta forma parti di e comision cu ta atendiendo di e parti di RWZI.
Tin un persona cu ta mandando comunicado cu ta bisa cu minister, hunto cu e otro departamentonan no sa di kico ta pasando di RWZI. El a indica cu e ta sinti cu e persona ey ta sigui crea discordia na luga di forma parti dje solucion. E ta sigui trece mal informacion y discordia den comunidad. P’e tipo di e cosnan aki e minister no lo gasta su tempo. E ta kere cu un solucion pa loke ta RWZI mester ta implementa. E expertonan cu tin hopi aña ta traha riba esaki t’esunnan cu ta contribuyendo p’asina yega n’e solucionnan concreto.
