Aruba, como isla, ta depende grandemente ariba e sector maritimo pa entre otro gran parti di nos bishitantenan (linea nan di crucero), pero tambe importacion di cuminda, materia prima y combustibel. E paisnan cu ta ricibi hopi barco manera Aruba, mester tene cuenta cu e leynan internacional y percura pa semper keda cumpli cu esaki nan. Si esaki no ta e caso e pais por haya confronta cu problema serio. Cada pais cu ta ricibi barco, mester tin un asina yama administracion maritimo (Directie Scheepvaart), cu ta percura pa e pais ta cumpliendo cu e leynan internacional.
Na aña 2020 e paisnan den Reino a cera un acuerdo pa instala un asina yama Koninkrijks Maritieme Administratie (KMA). KMA tin como tarea principal pa tin colaboracion entre tur administracion maritimo pa asina yuda otro cu asunto ariba tereno Maritimo. Esaki ta percura pa Reino Hulandes por pasa e asina yama IMSAS Audit di IMO London cu lo tuma luga na inicio di aña 2023, cu exito.
Den cuadro di e preparacionnan pa e audit aki, recientemente Minister di Transporte, Ursell Arends, a haya un bishita di un delegacion di KMA for di Hulanda unda a papia di e cooperacion, e preocupacionnan existente, pero tambe di e oportunidadnan cu tin pa Aruba- y hermana islanan cu posibel cooperacion y ayudo di e expertonan tanto di Hulanda como e otro paisnan den Reino.
Ta di suma importancia pa reconoce e importancia di nos sector maritimo y Directie Scheepvaart cu ta encarga cu esaki. Directie Scheepvaart ta trahando incansablemente y continuamente pa por sigui tene Aruba den cumplimento cu tur e leynan internacional.
