Yiftach Milo, ta e director saliente di Hebrew Immigrant Aid Society Aruba (HIAS) pa e ultimo dos aña. Pronto e ta bay asumi un tarea nobo na Romania pa habri oficinanan di HIAS eynan cu ta ricibi e refugiadonan di Ucrania. Recientemente tabata un momento pa yama Milo ayo y danki pa tur loke el a haci. A combersa cu ne pa haya sa di su experiencia riba nos isla. Milo ta bay cu un bon impresion di Aruba y cu lesnan siña durante e pandemia.
E tabata hopi sorprendi di a haya e chens di traha den Caribe ya cu ora ta pensa di situacionnan humanitario, hende no sa pensa riba e region aki. “E tabata un reto. Si bo pensa riba Aruba, e tin un concentracion grandi di migrante y refugiado cu a yega e isla y mi tabata contento di por a haya bon hende pa yuda HIAS como un ekipo pa duna tremendo servicio sea tabata riba aspecto psicosocial, asistencia financiero, ayudo pa mucha, sobrevivientenan di violencia di genero, etc.”
Adicionalmente, e reto tabata mas pisa door di e circunstancianan rond di e pandemia. “Tur hende na Aruba a celebra solidaridad y di verdad a purba di yuda otro y nos a logra,” Milo a expresa. Un di e retonan mas grandi durante pandemia tabata cu mester a cambia tur nan operacion inmediatamente, traha remotamente, papia solamente via telefon, pero toch brind e servicio na esunnan cu mester. “Tin biaha riscando nos salud, pero hende tabati mester di compasion. Nos djis anos, pero tur e organisacionnan na Aruba a logra di duna esey y mi ta felicita nan p’esey.”
Pa finalisa, e president saliente di HIAS ta content cu awo Aruba ta mas habri naun integracion cu refugiado y migrantenan di Venezuela y di otro pais den nan forsa laboral. E ta kere cu acceso na permiso di trabo uta e unico manera sostenibel pa e comunidad Venezolano na Aruba. “Aruba ta un luga diverso y mi ta kere cu celebra e diversidad ey solamente lo por beneficia e proximo generacion di e pais aki.”
HIAS ta un organisacion no lucrativo pa proteccion di refugiado cu a lanta na 1881 na Merca y oficina na 17 pais rond mundo.
